Helse Fonna innfører fleire strakstiltak
Helse Fonna ser seg nøydde til å innføra tilsetjingsstopp for alt personell, med unntak av dei fem klinikkane.
Dette skriv dei i ei pressemelding. Det er HR, drift, økonomi, administrasjon, fag og forsking og kommunikasjon som vert råka av tilsetjingsstoppen. Det vert også reduksjon i bruken av innleigd personell og konsulentar.
Ytterlegare tiltak
Annonse
– Me har valt å skjerma klinikkane, men det betyr ikkje at støttetenestene er mindre viktige. Alle i Helse Fonna har ei like viktig rolle i å sikra dei gode helsetenestene me allereie gir, men i ei tid med lange ventelister etter pandemien vurderte me at dette var det rette grepet, seier administrerande direktør Anders Hovland i pressemeldinga.
Vidare seier dei at det på sist styremøte blei gjort fleire vedtak knytt til den økonomiske situasjonen føretaket står i. Styret støtta tiltaka, men var også tydeleg på at føretaket er i ein alvorleg økonomisk situasjon, og at det difor må bli sett i verk ytterlegare tiltak for å redusera overforbruket mest mogeleg i fjerde kvartal.
Hovland understrekar likevel éin ting.
– Ingen tilsette i Helse Fonna skal miste jobben. Dei tilsette legg ned ein stor og viktig innsats for pasientar, pårørande og samarbeidspartnerane kvar einaste dag. Og som det kom fram tidlegare i haust så har Helse Fonna svært gode resultat på mange viktige kvalitetsmål, og på nokre område er vi best i landet. Det er viktig for pasientane våre, og det skal vi vere stolte over, avsluttar han.
