Hellesøy ankar konkurskrav

– Me har jobba målretta vidare med konseptet vårt etter at me vart sendt til skifteretten. Me har motsett oss kravet om konkurs, og sendt anke til lagmannsretten. No ventar me i spenning på kva som skjer der, seier Magnar Hellesøy til Grenda.

Selskapet Green Ship Design er kravd konkurs, men Hellesøy sit som eigar av fleire selskap i Green Ship-buketten. I månadane som har gått etter det første konkurskravet, har gründeren jobba vidare med planane til Green Ship. Det Hellesøy ynskjer er å byggja store katamaranar som kan gå i 30 knop og frakta laks frå Vestlandet til Rotterdam på 18 timar.

– I den tida som har gått, har me no fått på plass «Proof of consept», som det heiter i designkretsar. Me har også CFD-testa (fluiddynamisk dataanalyse, journ.merk) konseptet, og det stadfestar at designet er det me heile vegen har hevda det vil vera. Me har også sett ein pris på selskapet, og sagt kva som må til for å driva oss framover. Når me kjem dit at me skal byggja båtar, trengs det mykje meir pengar på bordet, er Hellesøy klar på.

Green Ship Design er slått konkurs – held fram i nytt selskap

– Du var taus då det det første konkurskravet kom.

– Det var strategien eg valte då, og som eg vurderte å vera den rette den gong. Så lenge me er i ein rettsprosess vil eg ikkje gå i detaljar på kva som har skjedd. Når ein har halde på så lenge og jobba så mykje med dette som eg har, så gjer ein det ein kan for å koma i mål med dette. Dei fleste triksa i boka er prøvd for å feia oss av banen, og det tar me som ei stadfesting på at me har eit godt konsept, seier Hellesøy.

Grøn storsatsing på kaikanten

Advokat Per Ivar Hessen representerer den tilsette som fekk medhald i konkurskravet ovanfor Green Ship Design.

– Me har inngitt tilsvar til anken og avventar lagmannsretten si vidare vurdering av saka. Utover det har me frå denne sida per tid ingen kommentar, melder Hessen i ein kommentar.

Byggjer grønt reiarlag frå kaikanten i Rosendal