Held sommarstengt
Dersom ein i juli ynskjer å gå på kino i ruskevêret, så må ein nok smøra seg med tolmod. Kinoen held nemleg sommarstengt heilt til august.
Det kan avdelingsleiar Agust Magnusson bekrefte då bladfyken tek kontakt.
– Ja, det stemmer. Me har faktisk oftare stengt enn ope gjennom fellesferien. Me hadde derimot ope i fjor, samt nokre år etter at eg overtok leiinga for kinoen. Men i år så har det vore så lite folk på kino at me prøver å retta litt opp i økonomien ved å spara på å ta inn ferievikarar, forklarer Magnusson.
Annonse
I august
– Me ynskjer å ha ope, men i år så har det vore veldig dårlege kinobesøk over heile landet, inkludert her. Det tok seg derimot opp i juni, då hadde me dobbelt så mange besøkande som i juni i fjor. Det håpar me fortset til hausten, legg han til.
Når dei faste tilsette går på ferie, stengjer altså kinoen dørene. I august derimot skal alt tilbake i gjenge igjen.
– Det kjem nokre filmar i juli, desse skal då gå i august i staden for. Kinoen opnar att 31. juli, og programmet vert snart lagt ut, seier Magnusson.
Annonse
– Så neste film blir ikkje 13. september slik programmet syner akkurat no?
– Nei, på ingen måte. Programmet for august blir som sagt snart lagt ut. Det har seg rett og slett slik at me stundom legg ut filmar som kjem, slik at folk kan sjå kor tid dei kan sjå dei. Det er difor filmen «Quisling» ligg i programmet til 13. september, forklarar Magnusson avslutningsvis.
