Held julegudsteneste i alle kyrkjene

Kyrkjeverje Torstein Aarthun drar historiske parallellar som passar for anledninga når han skal forklara korleis det blir med gudstenester på julaftan. Tysdag hadde kyrkja i Kvinnherad eit møte om korleis dei skal løysa utfordringane, og planen er klokkeklar:

– Det blir julegudstenester i alle kyrkjene våre, seier Aarthun til Grenda.

Han utdjupar korleis og kvifor.

– Julaftan er den dagen med mest folk i kyrkjene her hos oss. Me har planlagt gudsteneste i alle kyrkjene, og det er ein festdag for oss. Med mindre det kjem endringar frå regjeringa, så kjem me til å stå på å ha gudstenester i alle kyrkjer, forklarer Aarthun.

Namneliste

For dei som vil ha med seg gudstenesta, så er det nokre småting som må gjerast.

– Det blir gudstenester med påmelding på telefon eller sms. Me held oss innanfor smittevernreglane, men det betyr at me kjem til å plassera kvar einaste. Ein skal ikkje berre vita kven som har vore med på eit arrangement, men også vita kvar dei sat, forklarer kyrkjeverjen.

At me har så mange kyrkjer i Kvinnherad som me har, betyr at mange får høve til å gå til kyrkjes på julaftan.

– I denne tida er det viktig at kyrkja er i gang. Ikkje berre med digitale gudstenester, for dette er viktige tradisjonar og fellesskap for mange. Faste prestar og organistar er i sving men også vikarar. Til og med kyrkjeverja skal inn i prestekappa og halda gudsteneste i nabolaget sitt, seier Aarthun blidt.

Han ser fram til å fylla opp kyrkjene med dei 50 som det er lov til.

– Er det fullt, så er det fullt. Det var det i Betlehem for nokre år sidan også. Men det blir det ikkje utan at folk melder seg på, sluttar han.