Held fram som KrF-leiar

Etter valet på årsmøtet er det klart at Aslaug Hellesøy fortset som lokallagsleiar for Kvinnherad KrF, og får med seg Leif Kongestøl og Iver Blokkum som nye styremedlemmer. Marit Årthun, Alf Jarle Langeland og Inger-Elin Nesheim held fram i lokallagsstyret. Langeland er gruppeleiar, og sit saman med Nesheim i kommunestyret etter inneverande val i haust.

I samband med årsmøtet har Kvinnherad KrF understreka kva dei blant anna arbeida for lokalt, noko dei gir uttrykk for i ei pressemelding. Dei seier dei seg glade og stolte av at kommunestyret i Kvinnherad har høyrt på Krf som brenn for at barn og ungdomar skal få delta i meiningsfulle fritidsaktivitetar, uavhengig av heimen sin økonomiske situasjon, og støtta fritidskort.

Meir leik, mindre skjerm

– Krf brenn for meir leik i dei tidlege skuleåra, tilgang på gode, nynorske lærebøker og medviten bruk av iPad og skjerm i grunnskuleundervisninga. Me ønsker oss ein Kvinnherad-skule med meir praktisk-estetisk undervisning og læring gjennom aktivitet, skriv dei.

Vidare står styrking av helsesjukepleiartilbodet i grunnskulen og fokus på tidleg innsats for at alle barn og unge skal finne sin plass i lokalsamfunnet, på prioriteringslista deira, saman med at Kvinnherad skal vera ein kommune det er trygt å bu i, heile livet – også mot slutten av livet.

– Me har og sterk tru på at små og mellomstore bedrifter, helst med lokalt eigarskap, er vegen å gå for å utvikla sterke, robuste og levande lokalsamfunn. God forvalting av naturen og ressursane me har, og å bevara naturen slik at komande generasjonar får nyte naturopplevingar i kvinnherske omgjevnader. Me har tru på framtid og positiv utvikling for folket i Kvinnherad i åra som kjem, uttalar styret i Kvinnherad KrF.