Held fram med planlagde prosjekt

Kvinnherad kommune vil gjennomføra planlagde investeringar så langt det er mogleg, og fleire prosjekt vil starta opp i løpet av kort tid.

Det kjem fram i ei pressemelding frå næringssjef Grete Solheim. Brannstasjonen på Husnes er eit stort prosjekt som blir sett i gang i desse dagar. Solheim lovar elles at politikarane vil få hyppig oppdatering frå næringssjefen og Kvinnherad Næringsservice om tiltak som er iverksett, samt oppdatering på behov frå næringslivet. Det er arrangert og vil bli arrangert fleire nettmøte med næringslivet.

 

Studiesenteret

Følgjande moment vert elles trekte fram:

* Administrasjonen jobbar med å framskynda oppstart av byggeklare prosjekt, og jobbar med å gjera flest mogleg prosjekt byggeklare.

* Omstillingsarbeidet vert styrka, og ein vurderer medlemskap i næringsklynger for omstilling som NCE Maritim Clean Tech.

* Smidige ordningar slik at bedrifter kan leggja om til nye driftskonsept, frå servering til catering, frå handel i butikk til heimlevering.

* Gjennom studiesenteret på Husnes ynskjer kommunen å tilby permitterte arbeidarar omskulering og vidareutdanning. Dette vil bli gjort i samband med NAV, Kvinnherad vidaregåande skule, Sparebank1-stiftinga Kvinnherad, tillitsvalde og fylkeskommunen.

* Det blir vurdert å tilsetja fleire på byggesak for å auka kapasiteten opp mot næringsliv og privatpersonar.

* Kommunen saman med Kvinnherad Næringsservice jobbar med eit marknadsføringsopplegg der ein vil oppmuntra til å handle lokalt.