– Held ein tråd i det som skjer heime

– Eg blei utfordra på dette, og dette er eit verv som er veldig avgrensande for kva ein kan engasjera seg i som politikar lokalt. Det skal vera råd å få gjennomført arbeidet på ein god måte, og det blir ein fin arena til å halda seg oppdatert på kva som rører seg i lokalsamfunnet, seier Hans Inge Myrvold om vervet som påtroppande leiar for kontrollutvalet.

Følga opp vedtak

– Dette er eit utval som først og fremst skal jobba systematisk og profesjonelt, og ikkje politisk. Ein skal halda tritt med at politiske vedtak blir følgt opp på rett måte, og at kommunen blir driven på rett måte; at dei som er i kontakt med kommunen oppfattar det som ryddig og godt. Det er nærast uavgrensa kva som kan koma på bordet vårt, meiner Myrvold.

Han ynskjer ei dialogprega og tillitsbasert ordning med dei tilsette i kommunen. Det skal ikkje vera eit utval som skapar frykt, men begeistring.

– Eg ynskjer særleg oppfølging av gjennomføring av vedtak som er fatta av kommunestyret, då eg ser mellom anna at det er eit gap mellom det som blir vedtatt av investeringar og det som blir sett i gang. Då blir det min og utvalet sin jobb å følgja opp kvifor det er for store gap mellom vedtekne planar og resultat, vurderer stortingsrepresentanten.

Gjennomføringskraft

– Over tid har ein sakka av på gjennomføringskraft på vedtaka våre. Mange av dei tilbakemeldingane som kjem frå næringsliv og private går nettopp dette. Har ein gode nok rutinar til å sikra godt nok framdrift? Og så treng me ei god samhandling med kommunestyret også, legg han til.

At utvalsleiaren har arbeidsdagen sin i nasjonalforsamlinga, skal ikkje vera eit uoverstigeleg hinder.

– Ser verkeleg fram til dette. Møta går på dagar som det vanlegvis ikkje er møte i Stortinget, pluss det er eit sterkt sekretæriat, så blir dette løyseleg. Eg elskar jo lokalpolitikken, sjølv om eg har vore sterkt fråverande dei siste to åra. Eg vil ynskja alle lukke til under konstitueringa i morgon. Det er mange nye representantar, og det er viktig å ta godt i mot alle desse. Alle stemmer tel like mykje, sluttar Hans Inge Myrvold.