– Held det fram i dette tempoet får me eit luksusproblem

Initiativet har blitt veldig godt motteke, og mange kundar kjem eins ærend innom butikken av den grunn. Butikken har vist fram to ulike design på sine sosiale medier, og kundane veit kva dei vil ha.

– Eg byrja å lage desse bukettane på tysdag, og starta salet onsdag. No har me allereie seld mange, og held det fram i dette tempoet vil me få eit lukusproblem, smiler Anne Marie Monssen.

Ideen vart til medan dei tilsette var på jobb, der radioen sto på, og dei høyrde om krigen i Ukraina. Kanskje bukettar kunne vore noko, undra dagleg leiar. Ideen slo an, og der frå rulla ballen.

– Det gjekk litt tid frå ideen kom til me fekk kome i gang, for det tar tid å bestille varer og slikt. Men i går var me i gong, og folk har vore på døra når me opna, rett og slett for å kjøpe bukett. Det er veldig kjekt å sjå at ideen vart godt motteke, seier Monssen takksamt vidare.

– Det er jo mange som ynskjer å støtta, men som ikkje veit heilt kva dei kan gjera, då kan det vera fint å vita at ein bidreg ved å kjøpe ein bukett, legg Belinda Bjørgen til.

Ukraina-design

Fargane er dei same som i det ukrainske flagget, og bukettane blir laga i to ulike design. Den eine består av gule tulipanar og blå tistlar, medan den andre består av nellik, brudeslør, alstromeria, ridderspore og tistlar.

– Det er ikkje så mange blomar som er naturleg blå, og sjølv om tistlar kanskje verkar litt upassande, er dette ein heilt annan type en den som veks villt, seier Anne Marie og dreg handa over dei mjuke, blå tistlane.

Ein kunde kjem inn for å kjøpe ein bukett. Han vel ein av dei med gule og blå blomar.

25% av inntektene frå bukettsalet skal gå til eit godt formål til støtte for dei som er råka av krigen i Ukraina. Nøyaktig kva formål det blir veit dei enno ikkje, for dei har invitert kundane sine til å koma med forslag.

– Det er så lite ein kan gjera for å hjelpa, men akkurat dette kan me gjera, sluttar Tine Huse.