Held brannøving i Åkrafjordtunnelen

Dette er ei fullskala øving der naudetatane deltek, saman med Vegvesenet. E134 i dette området blir stengd i tida øvinga finn stad, det vil seia frå klokka 09.30 til 11.30 den 7. september.

– Det er eit krav i Tunnelsikkerheitsforskrifta at vi skal ha brannøving. Dette er ein viktig del av vårt kontinuerlege arbeid med å sørga for eit effektivt, trygt og framkomeleg vegnett, seier praktisk tunnelforvaltar Karoline Bakken Bråthen i Statens vegvesen i ei pressemelding.

– Vi gjer dette for trafikantane sin tryggleik; for å vera best mogleg førebudde ved reelle tunnelhendingar. Ein del av øvinga er å bruka røykmaskin for å simulera ein brann i tunnelen. Det vil derfor vera mogleg å sjå røyk i området rundt tunnelen, legg ho til.

Den 7404 meter lange Åkrafjordtunnelen vart opna 15. juli 2000. Tunnelen vert gjennomsnittleg trafikkert av 2100 køyretøy per døgn. Av dette er 25 prosent, eller 525 stykk, lange køyretøy (tungtrafikk).