– Heilt på smertegrensa
Tove Omdal, einingsleiar ved Halsnøytunet, melder om at dei no er i ein endringsprosess i lag med fungerande sektorleiar, og at det rår ein svakt stigande optimisme ved institusjonen.
Publisert
– Vi har gjort oss nokre erfaringar, men løysingane med auka bemanning har vore mellombelse og no jobbar vi mot å finna meir varige løysingar. Vi har jo hatt eit stort sjukefråvær, men i juni har dette lege på 12 %, fortel Omdal.
Heile sektoren går no gjennom strukturendringar, og det er såleis ikkje mogleg å vite korleis framtida vert for dei tilsette ved institusjonen, noko som vart trekt fram som ei påkjenning for dei tilsette i uro-meldinga frå Vernetenesta.
Annonse
Omdal meiner dei faste tilsette har strekt seg så langt det går med tanke på nedskjeringar, og er difor glad for at dei no er inne i ein periode der arbeidssituasjonen er bra.
– No på sommaren har vi auka bemanning på fleire avdelingar, og vi har veldig flinke ferievikarar inne. Dei siste vekene har optimismen rådd, og vi har hatt ein bra arbeidssituasjon, fortel ho, og grunngjev dette med samtalar ho har hatt med fleire av dei tilsette.
Personalet gjer sitt beste for at brukarane ikkje skal merke noko til nedskjeringane, men terskelen for kva personalet kan makta er nådd.
– Ein kan ikkje sei at vi driv uforsvarleg, men det er ikkje mogleg å kutta meir, seier Omdal, som er spent på kva budsjettforhandlingane til hausten vil føra med seg, avsluttar ho.
