Heildagsskule i støypeskeia

«Kommunedirektøren føreslår ein pilot på heildagsskule frå skuleåret 22/23 og at den vert lagt til Hatlestrand skule 1.-7. trinnet.»

Slik vart forslaget om den komande heildagsskulen ved Hatlestrand omtala i saksframlegget Oppvekstkår – Handlingsdel, organisering av barnehagar/skular og heildagsskule, våren 2021. No er prosjektet inkludert i budsjettet for 2022, og er såleis klart til å setjast ut i live.

Pilotprosjektet vert av nasjonalt kaliber. Så langt er det nemleg berre ein annan heildagsskule i landet, Austrheim skule i Haugesund. Der starta dei opp i haust, men i motsetnad til Kvinnherad satsar Haugesund berre på heildagsskule for småskule-elevane.

Stort engasjement

I tett samarbeid med FAU, elevrådet, representantar for bygdene og skulen, lokale lag, Kvinnherad kulturskule, frivillige og føresette, er planane i ferd med å manifestere seg for korleis drifta skal gjennomførast i Kvinnherad. Særleg FAU har vore ein pådrivar for prosjektet.

Rektor ved Hatlestrand skule, Lilli Britt Urheim, meiner dei er langt på veg i arbeidet.

– Dagen vår vil byrje klokka åtte og vere ferdig 15.45. Dette er på grunn av skuleskyssen, og for at det skal passa med ferja frå og til Varaldsøy. Første del av skuledagen blir ganske lik som den er no, og så blir det ei økt med lekser på slutten av dagen, leia av lærarar, forklarar ho.

I siste del av skuledagen blir det også ulike aktivitetar og elevane får servert mat.

– Det blir truleg eit måltid med servering, og eitt måltid med smørjemat. Elevane frå Haukanes er til dømes ikkje heime før klokka er halv fem, og då er det ikkje nok med eitt måltid, forklarar Urheim, og legg til at formalitetane rundt måltida enno ikkje er heilt på plass.

I samband med matserveringa vil skulen ha behov for å laga eit kantinerom, men elles ser dei ikkje behov for å gjera endringar i bruksareala dei har tilgjengeleg.

Eit samarbeidsprosjekt

Når det gjeld aktivitetstilbodet er det særs viktig for skulen å setje saman eit tilbod som kan famna alle, og at elevane gjennom desse kan bli introdusert til nye og kjekke ting. Dette krev samarbeid med eksterne aktørar, blant anna med frivilligheita.

Sjølv om dette kan by på utfordringar, er det allereie etablert gode dialogar om samarbeid. Blant anna har kulturskulen vore positive til å bidra, og lista over potensielle aktivitetar i deira regi er ei vidareføring av Blås i skulen-prosjektet, dans og kor.

– Vi har mellom anna fått tydelege ønskjer frå elevrådet om kva aktivitetar elevane sjølv håpar på, og dei tek me med oss vidare. Her er det til dømes nemnd kunstverkstad, klatring, karate og kino, med meir. Elles vil me vita meir om kva me kan få til av aktivitetar når dei økonomiske rammene er klare, forklarte Urheim nokre dagar før det vedtekne budsjettet for heildagsskulen vart lagt fram.

350.000 kroner per semester

Prosjektet har no fått stadfesta sine økonomiske rammer, og i budsjettet for 2022 er det løyva 350.000 kroner til pilotprosjektet. Denne summen kjem på toppen av det vedtekne budsjettet for drifta av skulen i 2022, som i følgje Urheim ligg på 9,2 millionar. Dei påfølgjande skuleåra er det er sett av 700.000 kroner til drift av heildagsskulen, som førebels er skissert å ha ei varigheit på tre år.

Tre år meiner Urheim er lite for eit slikt prosjekt, og under møtet i levekårsutvalet 16. november, la ho difor fram ønskje eit om at prosjektperioden vert utvida til fem år.

– For å få testa ut ulike ordningar, og få gjort seg opp erfaringar som ein kan dra nytte av, er tre år litt lite. Dette gjeld også for kostnadane. For å forstå kva effekt prosjektet har, meiner eg det ville vore betre å prøvd ut heildagsskulen i fem år. Vil det ha noko effekt på språk eller læring? Blir det berre ein gratis SFO, eller kan ein sjå andre resultat? Det er dette som blir veldig spanande å sjå, seier Urheim engasjert.

Utjamning er målet

Det overordna føremålet med heildagsskulen er å gi alle elevane like føresetnadar.

– Ungane som går på skulen vår er veldig spreidd utover bygdene, og med heildagsskulen vil alle desse få eit likare tilbod, både på det sosiale, fysiske og kva gjeld læring, slår Urheim fast.

Utjamning var også tema for rapporten eit ekspertutval, leia av Camilla Stoltenberg, la fram i 2019, «Nye sjanser – bedre læring — Kjønnsforskjeller i skoleprestasjoner og utdanningsløp». Rapporten innehaldt mange forslag til korleis ein kunne oppnå dette, kor eitt av forslaga var heildagsskule.

Tiltaka i rapporten, som særleg retta seg mot skilnadar mellom kjønn, var mellom anna meint å skulle «gi alle barn ein like god start på skulegangen uavhengig av kjønn og sosial familiebakgrunn.»