Heidrar krigsseglar frå Uskedalen
På Stemneplassen i Uskedalen står det allereie to minneplakettar for folk som døydde under krigen. Torsdag denne veka fekk dei selskap av éin til.
For å heidra krigsseglaren Torger Olsen Fet tok Uskedal Friluftslag initiativet og bestilte ein splitter ny plakett dedisert til Uskedelingen som døydde under krigen.
For god
Annonse
Torger Johan Feet vart fødd i 1886 på Tresshaugen på Øvre Fet i Uskedalen. Han enda opp som kaptein og segla på amerikanske skip, i krigsåra derimot var han med på torpederinga i 1942. Likevel var det året etterpå at krigsseglaren mista livet i eit tragisk forlis om bord i MT Gulfland, som var lasta med flybensin då det kolliderte med eit anna skip frå same rederi utanfor kysten av Florida.
For fire år sidan vart det også skrive ei bok om blant andre krigsseglaren og livet hans. Forfattaren Finn Bakke frå Bømlo hadde i utgangspunktet berre bestilt opp i eit lite opplag meint til familien. Leiar for Uskedal Friluftslag Kristian Bringedal tykte derimot det var synd at ikkje fleire fekk gleda av å lesa den interessante boka.
– Me har fått lov til å trykka opp eit nytt opplag på 100 bøker og selja dei fritt. Denne boka er rett og slett berre for god til ikkje å delast meir, sa Bringedal medan han bladde i boka og synte fram alle bileta, blant anna frå forliset til MT Gulfland i 1943.
Det funkar
Annonse
På torsdag var altså den innhyra kunstnaren, Arne Mæland frå Os, på plass på Stemneplassen for å fullføra arbeidet. Saman med sonen sin Vidar Bratlund Mæland var det dei som hadde fått oppdraget med støyping og montering.
– No er me nesten ferdige, men det har skjedd ein feil i patinaen, mest sannsynleg frå produksjonen. Det må me jo sjølvsagt få ordna, forklarte Mæland akkurat i det Tore Nordal Pedersen frå Uskedal Friluftslag kom med ein våt svamp.
– Eg syntest det såg litt laust ut. Det funkar jo dette her, ropa Pedersen ned til resten av laget medan han skrubba vekk dei svarte flekkane på bronseplata.
– Det var bra, då slepp me å ordna med ein dyr bronseslipar. No kan plata få ein naturleg patina med åra, svara Mæland letta.
Vidare forklarte Mæland at rein bronse fyrst er heilt blank, men at han blir mørkare med tida og til slutt blir heilt svart.
Minneplaketten skal i fylgje Bringedal vera klar til avduking på frigjeringsdagen 8. mai.
