Heidra både frigjeringsdagen og veteranane med krans

– Eg syns det er ein viktig dag å markera. Ein skal ikkje gløyma, korkje fridommen som ein kjempa seg til på frigjeringsdagen, eller offera som veteranane våre har gitt. Dei som har vore ute i fredsbevarande teneste, har gjort den innsatsen som dei generasjonane har kunna gjera, og det har kosta mykje for mange.

Det sa Alf Helge Hermannsen i samband med kransenedlegginga ved bautaen i Rosendal då det var minnemarkering på frigjering- og veterandagen 8. mai.

Sjølvstende

Sjølv kom Hermannsen meir eller mindre rett frå heimevernsøving i HV 09-211 Kvinnherad og indre Hardanger. Han heldt og la ned kransen, medan ordførar Hans Inge Myrvold heldt tale.

Ordføraren skildra frigjeringsdagen som symbolet på fridom og sjølvstende.

– Kampen og motet som blei ført frå dei mange, og her i bygdene i Kvinnherad, står ein i evig takksemd for. Dei gav oss alle den største gåva eit menneske og samfunn kan ha, fridom, håp og kjærleik. Me har mange å minnast denne dagen. Den børa motstandsstyrkane våre bar på gjennom eit halvt tiår med krig og ufred, der fleire gav livet i kampen for fridom. Den tyngste tida for nasjonen og folket, gav oss 8. mai 1945, med flagg, song og rettferd, sa Myrvold.

Han meinte det difor er så viktig å halda fram denne dagen som det store vendepunktet i vår nasjons historie, at ein aldri må gløyma, aldri teia og alltid heidre alle dei som stod i kampen.

– I vår tid handlar frigjeringskampen om fredsstyrkar i andre land, humanitært arbeid og diplomati. Gje husly og hjelp til dei som treng det mest av alle i verda. Norge skal og må halde fram med nestekjærleiken for folk i alle verdsdelar. Den dag i dag, 8. mai 2021, er det mange som lever med og har gitt livet i internasjonale fredsbevarande oppdrag. Alle dei som har ofra familie og vener, for å sikra at eit verdssamfunn skal halde saman, heldt Myrvold fram.

– Fred og forsoning

Ordføraren slo fast at veteranane våre er edelsteinane og kjernen i vår tids frigjeringskamp.

– Dei har stått fremst i vår nasjons bidrag for fred og forsoning. Til dei alle; ein heil nasjon er evig takksam den innsats og mot dette har kosta, sa han før Hermannsen la ned kransen ved bautaen, gjekk i rett og gjorde militærhelsing til hua.

Kring tjue hadde funne vegen til seremonien ved bautaen i Rosendal. Det vart også lagt ned blomekrans ved bauten på Husnes i samband med frigjering- og veterandagen.