Håvard vart heidra

I slutten av oktober hadde Håvard Sætrevik sin siste arbeidsdag i Grenda, etter 24 år og 10 månader hjå same arbeidsgjevar. Karrieren starta som annonseseljar og fortsette som journalist, før han hausten 2006 overtok som redaktør etter Simon Sortland. Den 1. november 2024 hadde 53-åringen sin fyrste arbeidsdag som informasjons- og kommunikasjonsrådgjevar i Kvinnherad kommune.

Ikkje gullklokke

Fredag 13. desember vart det halde styremøte i Grenda, med påfølgjande julelunsj på Rosendal Fjordhotel for alle tilsette og styremedlemmene. Også unge Sætrevik var invitert, slik at han kunne takkast skikkeleg for innsatsen i Grenda. Det vart imidlertid påpeika at sidan han mangla to månader på 25 år, var det sjølvsagt heilt uaktuelt å overrekkja gullklokke. I staden måtte han nøya seg med eit gåvekort på Rosendal Sport, to flasker vin og ein bukett.

Dei fire styremedlemmene heldt kvar sine taler, det vil seia styreleiar Knut Førland, Reidar Hystad frå Polaris (tidlegare Bladet Sunnhordland), Øystein Vormestrand frå Amedia (tidlegare Haugesunds avis) og den lokale aksjonæren Knut Johannes Helvik. Alle takka Håvard for svært god innsats gjennom både krevjande, spennande og gode år.

Teikning

Tale vart det også frå underteikna og dagleg leiar Jarle Håvik. Dei slo fast at det hadde vore ei stor glede å jobba i lag med Håvard Sætrevik desse åra. Samstundes påpeika dei at som tilsett i Grenda var det ikkje mogleg å nominera han som årets namn i Kvinnherad. Trøysta fekk vera at han uansett skulle få ei karikaturteikning laga av Eivind Bøvor, som er fast leverandør av premien til den som vinn denne prestisjetunge kåringa.

Teiknaren har fått med seg både eit fat med tiramisu for å illustrera Sætreviken sine framståande emne som kokk, ein drink som viser hans interesse for nettopp blanding av ulike drikkevarer, ei fotballdrakt og lagbilete som ikkje treng nærare forklaring, Fantasy Premier League på pc-skjermen som sjølvsagt viser til Håvard sin suksess som Fantasy-manager, og ikkje minst eit lass cola-flasker og -boksar som heller ikkje er tilfeldig valt.

Originalteikninga er allereie kome på veggen heime i Målet i Rosendal, medan ein kopi prydar det nye kontoret til Håvard Sætrevik på rådhuset.