Hausta jubel frå bygdefolket

I overkant av 50 valebuar tok måndag kveld turen opp til Bjørkedalsdammen for å visa motstand mot kommunen sine planar om å riva han. Det vart difor full jubel og applaus då ordførar Peder Sjo Slettebø sa at fleirtalspartia ikkje ville gå inn for riving.

– Det var veldig kjekt å høyra. Eg har gått med ordføraren heile vegen opp her og argumentert det eg kunne for å bevara dammen, og han nemnte ingenting om det då. Så det kom bardust på oss alle, trur eg. Men ingenting er meir gledeleg, seier Knut Rune Fatland.

 

Vart skremt

Han var initiativtakaren bak folkemøtet ved dammen, som i 1910 vart etablert som inntaksdam for det første kraftverket på Valen. Fatland kom over Kvinnherad kommune sin søknad om å fjerna Bjørkedalsdammen då han laurdag sat og leste på kommunen sine postlister, og bestemte seg raskt for at her måtte noko gjerast.

– Eg vart skremt, og sette meg difor rett ned for å skriva ei innkalling til eit folkemøte. Og sjølv om datoen ikkje var den beste og folk trudde det heile var ein spøk, så viser dagen i dag kor stort engasjementet for denne kulturskatten er, seier Fatland.

 

Historietime

Med seg på måndagens appell hadde han leiar i Valestiftinga, Reidar Handeland. Etter at Fatland hadde ynskt velkommen, tok Handeland valebuen gjennom Bjørkedalsdammen si lange historie.

– Det er fantastisk å sjå at så mange engasjerer seg i ei sak som dette. Vi skjønar veldig godt kommunen sine tankar, men dette er eit kulturminne som ikkje berre kan rivast. Vi må heller sjå på moglegheiter for å samarbeida om å bevare han. Så orda Peder kom med var verkeleg gledelege, seier han.

 

Spleiselag

Ordførar Peder Sjo Slettebø tok ordet til sist og fortalte då at han tidlegare same dag hadde prata med varaordførarar Hans Inge Myrvold, og at dei saman var einige om at Høgre og Senterpartiet ikkje ville gå inn for riving når saka skal opp i formannskapet. Men var samstundes klar på at det krevst samarbeid for å få det til.

– Det er ikkje til å leggja skjul på at det er utfordringar i forhold til kostnadane med å rusta opp dammen. Men vi vil gå i dialog med Valestiftinga og fylket for å prøva å få til ei løysing, og så vil vi nok ha bruk for den gode dugnadsanda til valebuen, seier Peder Sjo Slettebø.

 

Tre alternativ for dammen

Slik Bjørkedalsdammen er i dag tilfredstiller han ikkje gjeldande krav til stabilitet og må vølast for å bli stabil. Kostnaden knytt til dette er såpass stor at Kvinnherad kommune vurderer det som rimelegare å riva den.

For å finna ut kva som er mest gunstig, har Norconsult utarbeidd tre alternative tiltak for kommunen.

1. Forsterka dammen til ein estimert pris på 8,1 millionar kroner.

2. Senka vasstanden to meter og støypa på oppstraumsplate i betong for tetting. Også dette tiltaket har ein estimert kostnad på 8,1 millionar kroner.

3. Riva dammen og føra vassdraget tilbake til sin naturlege stand. Noko som vil kosta 3,2 millionar kroner.