Hatlestrand har fått minnelund

Det er heile tolv kyrkjer i Kvinnherad, og kvar av dei skal få ei minnelund på kyrkjegarden.

– Vi har teke om lag to i året, og no har vi fem igjen etter Hatlestrand. Det er eit langt prosjekt, men det er veldig kjekt å halda på, fortalde Alf Jarle Langeland i førre veke.

– Det er dei minste kyrkjene igjen no, Ølve, Fjelberg, Ænes, Varaldsøy og Åkra, skaut Trond Inge Kvandal inn.

Tysdag denne veka vart minnesteinen sett på plass, og gravplassarbeidarane er nøgde med korleis det vart sjåande ut.

– Det er kjekt å ha ein plass ein kan sitja og minnast dei vi har mista. Då er det fint om ein har ein benk eller to, ein plass å legga blomar og litt fint rundt seg, fortalde dei.

Gjer arbeidet sjølve

Arbeidet med å setja opp minnelund er meir enn ein kanskje trur. Fyrst må det søkast til Statsforvaltaren om å få lov til å setja opp ein minnelund, så må plassen lagast til, steinane hentast, klargjerast og setjast opp og området rundt gjerast fint.

– Det er ein del planlegging, papirarbeid og anna arbeid. Det er ei heila prosess, fortalde Langeland.

– Vi var inne i Jondal i vinter og plukka ut steinen sjølve. Vi tok turen med hengar og henta. Så her gjer vi det meste sjølve. Då blir vi mest nøgde òg, lo Kvandal.

– Dette likar vi, detta kosar vi oss med. Det er rett og slett veldig kjekt arbeid, fortalde Langeland.

Bakom minnelunden blir det ein plass til urner. Dei som vert nedsett her får namnet sitt på steinen.

– Folk flyttar meir og meir på seg og bur ikkje der foreldra budde, så det er mange som ikkje har høve til å stella graver, då er dette eit godt alternativ, fortel Langeland.

Spente på mottakinga

Dei to er spente på korleis minnelunden vart motteke på Hatlestrand.

– På Utåker har minnelunden stått ei stund men det er inga namn på den enno. På Husnes har vi fått ein 10-12 namn. Det er kanskje ikkje så vanleg med urnenedsetjing enno, undra dei seg.

– Det var ei på Valen som bestilte plass når vi heldt på å laga til der. Det var litt artig, ho skulle absolutt liggja der. Ja, det er greitt det, men du må venta litt, sa eg, lo Kvandal.

Nett no har dei ei søknad inne om kyrkjegarden på Varaldsøy, som er neste som skal få minnelund.