Harmlaus vinyl eller homohets?
Onsdag morgon, då Margit Lund Mikkelson kom på jobb, vart ho møtt av eit fargerikt kunstverk. Eller er det eit kunstverk?
Publisert
Sist oppdatert
– Teksten gjorde det litt vanskeleg å tolka om dette er tenkt som eit kunstverk eller ikkje. Er det gjort med kjærleik eller hat, bør det få henga eller ikkje? spør ho, utan å kunne svare på spørsmåla.
Kunstverket var limt opp på ein boks like utanføre Folgefonnsenteret. Det er laga på ei LP-plate, på side 1 av Brian Connolly sin «Live at the Blarney Show» for å vera heilt nøyaktig. LP-plata er dekorert med regnbogestriper, raude hjarter, teksten «Jævla homo» og er signert Mor5. O’en er teikna som eit hjarte.
Annonse
Dryg tekst
Margit rådførte seg med fleire om kva dei meinte, før ho valte å fjerna det. Fleirtalet av dei ho spurde meinte nemleg teksten øydela.
– Teksten gjorde at det vart opplevd som litt dryg av fleire, så eg tok det ned. Hadde det berre stått «homo» ville det vore noko heilt anna. Men dersom eg får vite tanken bak, og får ei forsikring om at det er gjort med gode intensjonar, stiller det seg jo annleis, held ho fram.
Det at den regnbogedekorerte LP-plata kan tolkast i fleire retningar og såleis bidreg til debatt, er noko som dei rådførte var samde om at gjer kunstverket interessant. Det er noko av grunnen til at Margit ikkje er framand for å henge den opp att om det viser seg å vera eit godhjarta gatekunst-stunt.
Annonse
Mor5 står bak fleire vinylverk som prydar det offentlege rom her på Vestlandet.
Dersom nokon ynskjer å vedkjenna seg kunstverket, eller brått innser at dei manglar ei av Connolly-platene sine, bed Grenda om at dei tek kontakt med underteikna.
