Hardanger Biogass får 35,4 millionar i investeringsstøtte frå ENOVA
Selskapet får Investeringsstøtte på totalt 35,4 millionar kroner, noko som bidreg til at prosjektet vert fullfinansiert og realisert.
Publisert
Sist oppdatert
– No skal me tilsetja, og me har no finansiering til å realisere prosjektet, fortel Reinhard Lund-Mikkelson.
Hardanger Biogass AS har over fleire år jobba kontinuerleg med å planlegge og prosjektere eit biogassanlegg i Kvinnherad.
Annonse
– I løpet av 2022 er fase 2 av prosjektet fullført, byggjeløyve er gitt og på tampen av året kom eit positivt svar på søknad om investeringsstøtte frå ENOVA. Investeringsstøtta er på totalt 35,4 millionar kroner, og det bidreg til at prosjektet vert fullfinansiert og realisert, fortel dagleg leiar for Hardanger Biogass Reinhard Lund-Mikkelson i ei pressemelding tysdag kveld.
Klare til å tilsetja
– Det at me no har fått på plass støtta frå ENOVA gjer at dei siste bitane fell på plass. Me har allereie sidan vi mottok svar frå ENOVA 22 desember i 2022 starta den praktiske planlegginga av prosjektering og realisering, forklarer Lund-Mikkelson vidare.
Dei har i løpet av 2022 klargjort ei tverrfagleg prosjektgruppe som kan setja i gang relativt snart med neste fase av prosjekteringa.
Annonse
– Samstundes ønskjer me no å ta ein ny runde med landbruket og andre partnarar for å leggja til grunn ein så god logistikk som mogleg. Logistikken har stor innverknad på utforminga av anlegget vårt på Husnes og kan ha påverknad på detaljprosjekteringa, seier dagleg leiar Lund-Mikkelson
Hardanger Biogass ønskjer å satsa på lokal arbeidskraft, og byggja opp kompetanse i Kvinnherad.
– Dette er spesialkompetanse som krev fleire år å bygga opp, men som kjem til å vera avgjerande for vidare satsing på anlegg andre stadar i landet saman med samarbeidspartnarar. Selskapet vil ha behov for tilsetja på fleire fagfelt; frå sjåførar til fleire vogntog, logistikkoperatørar, bioingeniørar, prosjekttilsette og administrasjon, understrekar Lund-Mikkelson.
Hardanger Biogass inngår som del av Vireo AS som har som strategi å rulle ut fleire anlegg på landsbasis på same design. I tillegg til Husnes er det eit prosjekt på Lista som er om lag like langt komen, og det er fleire prospekt andre stadar i landet som er i evalueringsprosess. Lista Biogass har også fått ENOVA-støtte, kjem det fram av pressemeldinga.
