Har tilsett fastlege i Rosendal – lyser etter ny på Husnes

Av ulike årsaker vart 250 listepasientar i haust flytta frå fastlege i Rosendal til helsesentera på Hatlestrand og Halsnøy. For å kunne føra desse pasientane «heim» igjen, lyste kommunen etter ny fastlege i Rosendal. Det kom inn seks søkjarar, og no er Malin Henriette Mæland tilsett. 31-åringen er opphavleg frå Sunde, men bur no på Seim. Ho har tidlegare jobba på Stord sjukehus, medan ho det siste året har vore fastlege på Husnes.

Mæland er blitt fast tilsett i kommunen, og skal såleis ikkje vera sjølvstendig næringsdrivande slik nokre av dei andre legane er. Ho tek til i stillinga 1. mars.

Seks vil bli fastlege i Rosendal: – Svært gledeleg

Tilpassa listelengd

Kommunen har allereie starta prosessen med å finna ny lege på Husnes.

«Ved Husnes helsesenter arbeider i dag åtte fastlegar i eit kontorfellesskap med til saman eit listetak på 6.500, innbyggjartal i området er om lag tilsvarande. Organiseringa er eit felles AS for drift og investering. Stillinga består av fastlegeoppgåver med tilpassa listelengd (650-800 pasientar). Kvinnherad kommune er opne for å vurdera den stillinga som fastlønna. Kommunen ynskjer med dette å leggja til rette for ein enklare start som allmennlege. Samtidig er kommunen også open for tilsetjing som sjølvstendig næringsdrivande», står det i annonsen.

Søknadsfristen er 30. januar.

250 pasientar i Rosendal får fastlege på Hatlestrand og Halsnøy