Har søkt om igangsetjingsløyve

I eit følgjebrev til denne søknaden, datert 3. juli, kjem det mellom anna fram at diameteren på Salmon Eye er blitt utvida frå 25 meter til 26,1 meter. Vidare har det tidlegare rammeløyvet vurdert maks-talet på besøkjande til 50. Grunna eit komplett utarbeidd brannkonsept med rømmingsvegar, er no kapasiteten auka til at 100 personar kan vitja anlegget samstundes.

– Med dette som bakgrunn ser me ingen grunn til å fastsette maks-talet personar til under det som er tryggleiksmessig forsvarleg, står det i søknaden, som også understrekar at det vanlege besøkstalet vil liggja på rundt 30 personar.

Dette er for at informasjonsflyten skal vera god under guida omvisingar med skuleklassar og liknande.

Siste endring som kjem fram i eit følgjebrev til søknaden om igangsetjingsløyvet, er at visningsanlegget er flytta om lag 300 meter lenger nordaust, og med det vil liggja lenger vekk frå land.

– Dette då ein såg behov for noko meir avstand i frå eksisterande oppdrettsanlegg med omsyn til fortøyingsanalyse (tryggleik) og siktforhold, grunngjev Berit Haga Vikanes ved ABO Plan og Arkitektur Stord.

Desse endringane er dermed inkludert i den siste søknaden om klarering av plasseringa av Salmon Eye på lokaliteten.

Uproblematisk vilkår

Prosjektet vart også godkjent med vilkår av Arbeidstilsynet 22. juni. Arbeidstilsynet kunne nemleg ikkje sjå å ha motteke tilstrekkelege opplysningar om at ventilasjonen er i tråd med gjeldande krav, og sette vilkår at dette kjem på plass.

Arbeidstilsynet gjorde samstundes merksame på at krava til tilfredsstillande inneklima blir forvalta strengt.

Sebastian Torjusen slår fast at vilkåret er heilt uproblematisk, og at dokumentasjonen Arbeidstilsynet etterlyser vil vera på plass ved eit ettersyn.