Har selt Rosendal Fjordhotel

Ein av dei viktigaste aktørane i Kvinnherad-turismen er no over på nye hender, etter at West Coast Invest overtok Rosendal Fjordhotell 1. januar 2022.

– Situasjonen er at eg nærmar meg 67 år og pensjonsalder, og det er hovudgrunnen til at me no sel. Det er ikkje noko me må gjera, for me har ei sunn og god drift, noko tala viser år etter år, seier Havnerås til Grenda

50 år med hotell

Hotellet fylte femti år i 2021.

– Kvaliteten på huset og standarden er god. Det er viktig for meg at ein finn nye eigarar som har økonomisk ryggrad og kan ta huset vidare, slik at me kan møta morgondagens krav, og det har me funne. Me kunne gjort desse investeringane sjølve, men då ville det gått tid før me hadde kome i posisjon til å selja igjen, og då spelar dette med pensjonsalderen inn – igjen. Eg har ikkje dei same kreftene lenger som eg hadde før, vedgår hotellsjefen.

I haust var dei rundt og lodda interessa for hotellet, og ho har i følgje Havnerås vore stor. Somme har hoppa av på grunn av koronatida, for dei har hatt vanskelege situasjonar og hatt nok med å få sitt eige til å gå rundt.

– Timinga spelar inn her, og den er sånn sett ikkje ideell nett no. Me endar på desse no, og dei har musklar, interesse og er forelska i Rosendal. Han eine er av kjøparane er innom her på båttur kvart år, og det siste han sa i sommar var: «Skal du nokon gong selja, så ring meg», smiler seljaren.

Nøgd seljar

Arne Havnerås held fram som hotellsjef inntil vidare, og med det same laget.

– På sikt blir det endring, elles hadde me ikkje gjort dette. Me har hatt ein fin prosess, det har gått fort og dei overtok frå nyttår, seier han om investorane som også eig hotell på Flesland, i tillegg til å ha eigedommar landet over, frå Finnmark til Oslo.

Hotellsjefen har vore ved hotellet i eitt sidan 1. mars 1977, altså straks 45 år.

– Det har vore ei fantastisk reise, og eg angrar ikkje på nokon ting. Har hatt så mange gode opplevingar med utruleg mange forskjellige folk. Men det har vore vanvettig mykje jobb.

– Kva sel de for?

– Både me og kjøparane er nøgde. Resten er konfidensielt, er alt Havnerås vil seia om det.

Salsprosessen starta som sagt i haust, men:

– Eg har høyrt rykte om at me har vore til sals tidlegare, eg kunne sikkert fylt ti Grenda med dei, men det har ikkje vore hald i før no. Det skal på plass nye folk og nye strukturar, samstundes som dei vil driva vidare som eit uavhengig, kjedefritt hotell. Dei likar det ein har gjort her. Og dei har mykje kapital å bruka på det, vurderer Havnerås.

– Det er positivt at me har fått gode eigarar som vil vera med å løfta framover, og samstundes trygga arbeidsplassane som er her, sluttar han.

Rosendal Fjordhotel AS:

Driftsinntekt 2020: 19.947.000

Årsresultat 2020: 2.132.000

28 tilsette

Rosendal Fjordhotel Eiendom AS:

Driftsinntekt 2020: 3.000.000

Årsresultat 2020: -1.971.000

West Coast Invest AS

Eig butikk-kjeda Spar Kjøp

Eig shipping-selskapet Spar Shipping

Eig ei rekkje eigedomar i og rundt Bergen, blant anna Scandic Flesland.