Har selt for 400 millionar – og kjøpt produksjonshall

Frå å mest vera konkurs i 2013, hadde Norwater ein ordreinngang på 400 millionar kroner i 2023 og fire månader inn i 2024.

– Alt skal ikkje leverast i år, men eit godt nysal er uansett viktig, seier dagleg leiar Per Einar Gjerding.

Brønnbåtar

Det blei tatt fleire grep då kemneren omtrent banka på døra for eit tiår sidan, inkludert å endra til Norwater for å forankra firmanamnet opp mot produktet. Nedbemanning var også naudsynt.

På eit tiår er veldig mykje endra. Underskot i 2013 og nullresultat i 2014 har sakte blitt til 20 millionar i pluss i 2023. Talet tilsette i Norge har gått frå 11 til 26 på åtte år. No er bedrifta for alvor i ferd med å veksa ut av sine tilgjengelege lokale. Ein 2400 kvadratmeter stor hall skal bøta på det.

– Budsjett i år seier omsetning på 175 millionar kroner, men etter alle solemerke kjem me til å enda over 200 millionar, seier Gjerding nøgd.

Norwater hadde eit historisk godt salsår i fjor, og har ein stor del av dei ordrane med over til i år.

– Salet går i stor grad til brønnbåtar, men me har også kome oss inn på gruvedrift, spesifikt Nordic Mining sitt prosjekt i Sunnfjord, og på oppdrettsanlegg på land, forklarer Gjerding.

2400 kvadratmeter stor hall

Norwater har samarbeidd med BKS på Sunde i mange år, men no er kapasiteten på Opsanger sprengt, både på produksjonslokale og kontorlokale.

– Me såg at dagens driftsmodell ikkje ville gjera det råd å veksa vidare. Hallen me har kjøpt blir eit strukturelt grep som vil gjera det mogeleg å halda fram trenden hos oss. Det som me meiner sannsynleggjer vidare vekst er brønnbåtmarknaden, samt nye marknader som gruver og landbasert oppdrett, analyserer leiaren.

I tillegg aukar dei reservedelsalet, noko som gjer dei mindre sårbare for svingingar i marknadane.

– All erfaring tilseier at det går opp og ned i dei ulike marknadane, men etterspurnaden etter ferskvatn aukar, og for kvart år som går blir det mindre tilgjengeleg ferskvatn i verda. Såleis har me eit godt produkt, meiner Gjerding.

Planen er å samla all aktivitet her i Høylandsbygd. Ein 2400 kvadratmeter stor produksjonshall er kjøpt, og blir demontert i Horten i desse dagar. Han blir frakta til eit rydda og planert område ved Hillestadvågen, der han skal monterast nokre hundre meter frå dagens kontor.

– Me håper å vera operative i hallen i slutten av 2024, seinast første kvartal 2025. Me har eit mål om å setja opp eit eige administrasjonsbygg på sida i ein seinare fase, men det må bli etter at hallen er tatt i bruk og innkøyrt. Me veit at me ikkje klarer å gapa over alt dette i ein eingong, slår Gjerding fast.

Høgtrykk på Opsanger

Fram til hallen er på plass og Norwater får samla sin aktivitet til eitt rike, må bedrifta driva på fleire stadar. Administrasjonen er på plass i Høylandsbygd, der dei har vore heile tida. Produksjonen av ferskvassanlegg går for fullt i leigde lokale på Opsanger Næringspark.

– Me har levert ferskvassanlegg til tre brønnbåtar på sju veker, med samla kapasitet på 15 millionar liter vatn i døgeret, fortel Raymond Kaldestad.

Inne i produksjonshallen på Opsanger står Richard Bjørgen Ersland og Adrian Dømbe og monterer på høggir. Om få veker skal ny leveranse skipast i veg, fire konteinarar med døgnkapasitet på 1,5 millionar liter vatn kvar.

Anlegga blir ofte levert montert inne ein konteiner, slik at dei både blir enkle å frakta, men også kan stå ute på dekk.

– Det er mange som har stått veldig på for å koma i mål med leveransane me nett har hatt, skryt Gjerding.

Med ny leveranse like om hjørnet, blir det ikkje rom for å kvila på laurbæra. Og skal salstala innfriast, blir det høgtrykk vidare også.