Har opna ny praksis

Mads Strand (30) frå Valen har opna fysioterapitilbod på Husnes. Han er oppteken av ein heilskapleg behandling, og å hjelpa folk til å koma i gang med aktivitet.

Mads er opphavleg frå Danmark, men bur på Valen. Til vanleg jobbar han på Folgefonn DPS i allmennpsykiatrien.

– Der driv eg primært med fysisk trening for dei med angst og depresjon. Fysisk trening har som kjend stor innverknad på den psykiske helse, så eg hjelper dei å koma i gong med det samstundes som dei går i samtalebehandling i poliklinikken, fortel han.

På sidan av denne jobben vil han no tilby fysioterapi i andre etasje på Rosenteret på Husnes. Førre helg hadde han sin første pasient. Kvelden før han fekk besøk av bladfyken hadde han gjort ferdig den praktiske delen som til dømes å laga nettside.

– Det blir ein liten prosentstilling i fyrste omgang. Eg skal dyppa tærne litt og så får vi sjå kor det tek meg hen. Eg gler meg til å sjå pasientgrunnlaget og kva eg kan få til på sikt, smilar han.

Holistisk tilnærming

I tillegg til to jobbar tek Mads no ein master i smertebehandling med fokus på langvarige smerter.

– Det legg opp til ein meir holistisk behandling, altså dette med å sjå heile mennesket i staden for å fokusera på enkelte symptom. Det er kanskje ikkje berre ein skulder som er vond, det kan vera meir samansett enn det, fortel han.

Han fortel at det er behov for meir kompetanse innan emne, og at pasientar som har kroniske smerter ofte fell utanfor fordi ein ikkje alltid finn ein forklaring på smertene dei har.

– Det er ein spennande målgruppa som ofte er vanskelege å behandla, særleg om dei går med smertene i lang tid. Eg håpar at eg kan tilby meir spesialisert fysioterapi når eg er ferdig med vidareutdanninga, seier Mads.

Viktig med aktivitet

Mads har utdanning innan fysioterapi frå Danmark, og har tidlegare mellom anna jobba i bedriftshelsetenesta i Haugesund, på Stord sjukehus og som personleg trenar.

– Eg har ein del historikk innan dette med trening og kropp og helse, og har lenge vore oppteken av førebygging, fortel han.

Han har i fleire år hatt lyst til å starta ei treningsgruppe for vaksne som har lyst å koma i gong med trening men som saknar ein trygg arena.

– Eg håpar at eg på sikt kan få til nokre gruppetreningar. Vi har eit veldig fint treningsrom her på huset, og så har vi jo flotte omgjevnader rundt med Opsangervatnet og ikkje minst Husnes Stadion, seier han og legg til;

– Eg er stor tilhengjar av ein aktiv tilnærming. Vi kan godt starta på benken, men ein må ofte ut og bruka kroppen for å få det betre. Så å få folk i gong er viktig.