Har NM-tittelen i sikte etter nok ei helg med dobbelt gull

– Det gjekk over all forventning. Under løpet i Mo i Rana sist, krasja eg i over 200 km/t, så kroppen fekk ein del juling. I tillegg hadde eg ein krasj i fritreninga på fredagen før dette løpet, så eg har kjempa ein del med kroppen, fortel han.

Helgas løp var såleis av den tunge sorten, men sidan det var løp klarte Ripel Jensen, i lag med teamet å mobilisera når det verkeleg gjaldt.

– Ein bruker mykje krefter på å køyra, men når det er løp får ein adrenalin, og då går jo gardina litt ned, ler han.

– Korleis har formen vore no etter helga då?

– Den har vore jamt over dårleg, men det kjem seg. No får eg litt hjelp av fysioterapeut, og skal vera klar til siste reis i finalen 9.-11. september. Då går vi for samanlagt gull!

Lagarbeid

Marius ledar med 44 poeng før finalerunden går av stabelen i Sokndal. Då er det 50 poeng som skal delast ut, så sjølv om han no ligg svært godt an er han ikkje garantert den endelege palltoppen i årets NM.

– Det høgaste eg har kome tidlegare er på 2. plass, så det vil bli deilig om eg endeleg klarar å få den NM-tittelen samanlagt, seier han, før han legg til at sjølv om det enno er mogleg å gå forbi han i poeng, skal det godt gjerast.

Dei er til saman 6-7 personar som reiser på løp som Team Ripel'n, og Marius er svært takksam for støtta frå teamet, dei frivillige og samarbeidspartnarane.

– Eg hadde ikkje klart dette utan dei, mekanikarane og dei andre eg har rundt meg, sluttar han.