– Har mista ein heil generasjon

Hans Inge Myrvold var rask i snuen då folketalet for Hatlestrand vart kjent. Han og ordføraren vil no kalla bygdelaga på nordsida inn til møte for å drøfta kva som kan gjerast for å snu trenden.

Allereie måndag kveld, like etter at E-avisa til Grenda var sendt ut til abonnentane, heiv Hans Inge Myrvold seg på Facebook. «Alvorleg utvikling» skreiv han og viste til at Hatlestrand med sine 389 innbyggjarar aldri har hatt lågare folketal enn no (sidan folketeljinga i 1960).

– Etterpå hagla det inn med meldingar og telefonsamtalar, så innlegget skapte litt liv, kan du seia. Men det viser at bygdefolket er klare for å stå opp og ta eit tak for bygda si. Dei er uroa over utviklinga, og spør kva vi kan gjera med det, seier Myrvold.

Frå eigen oppvekst hugsar han at det var store barnekull og parallelle klassar på ungdomsskulen. Problemet er at folk ikkje vart verande i bygda.

– Den generasjonen eg gjekk på skulen med har i stor grad flytta ut. Berre ein og annan har blitt att, medan dei andre søkte større utfordringar innan utdanning og arbeid enn vi kunne tilby lokalt. Vi har såleis mista ein heil generasjonen. I dag trur eg nok det er ein ganske stor andel eldre på Hatlestrand, og då blir det jo ein del naturleg avgang, fortel han.

Les mykje meir om folketalsstatistikken i torsdagens Grenda.