Har midlar til kring 1 km

Førebels er det sett av midlar til å byggja kring 1 kilometer av gang- og sykkelvegen gjennom Herøysundet.

I kommunestyremøtet 26. november spurde Thorleif J. Hellesøy (Frp) om status for gang- og sykkelvegen gjennom Herøysundet.

– Ryktet seier at berre halve strekninga vert utbygd no. Er dette tilfelle, og kva tid vart dette orientert om/behandla politisk? sa han.

Hellesøy fekk ikkje tilbakemelding i møtet, men i protokollen finn ein svaret.

«… reguleringsplanen for gang-/sykkelveg gjennom Herøysundet legg samla sett til rette for utbygging av 2,2 km veg. Førebels anslag viser at dette har ein kostnad som overstig 100 millionar kroner, og det er difor lagt opp til etappevis utbygging. Utbygginga skal kostast gjennom Kvinnheradpakken, der det er sett av 29 mill. kr. Desse midlane vert nytta til fyrste etappe på cirka 1 km gjennom sentrum og sørover til og med kryss fv. 500/Sjøvegen ved «Nyesvingen», heiter det.

Vidare vert det opplyst at det aldri har vore planen å gjennomføra meir enn omlag halvparten av det den nye planen regulerer, men det vart likevel bestemt å regulera også den ytste delen. Det er eit ynske om å prøva å koma litt lenger sørover, til Bringedalsvegen sør. Dette er formidla vidare til prosjektleiar.