Har lokalisert mange potensielle bustadtomter

Som Grenda har skrive om ved fleire høve, ynskjer politikarane at kommunen skal satsa stort på tilrettelegging for bustadbygging framover, slik at ein kan nå målet om å auka frå vel 13.000 til 15.000 innbyggjarar. Spesielt har leiar Øyvind Hardeland (Ap) og nestleiar Oddbjørn Kroka (H) i PTM-utvalet vore frampå i denne saka.

Ynskjer sentrumsnære byggjefelt: – Kvinnherad er i krise når vi ser på utviklinga

Tysdag fekk utvalet ei orientering frå planrådgjevar Rune Helland om kva som finst av ledige bustadtomter mellom Løfallstrand og Dimmelsvik, med spesielt fokus på Rosendalsområdet. Helland starta med å presentera dei siste tala frå Folkeregisteret. Der kjem det fram at Kvinnherad har fått 53 fleire innbyggjarar det siste året, tilsvarande 0,4%. Også for eitt år sidan var det ein auke, trass i at Statistisk sentralbyrå konsekvent spår nedgang. Malmanger skulekrins hadde ein vekst på 23 personar. Det var nest største auke etter Husnes, som fekk ein pluss på 34. Samstundes hadde Seimsfoss den største nedgangen med minus 17. Rosendal ungdomsskulekrins består no av 3857 personar i alt.

– Vi har stadig fleire dødsfall enn fødslar, så det er tilflytting som fører til auken, opplyste Rune Helland.

Han la til at einebustader er den vanlegaste måten å bu på alle stader i Kvinnherad. Men kva som er på andre plass varierer mellom bygdene; på Husnes er det tomannsbustader.

Sørebøen

Rune Helland starta rundturen på Løfallstrand, der det finst nokre få ledige tomter. I Rosendal er det faktisk ganske mykje ledig, når ein summerer opp. Helland trekte mellom anna fram området mellom prestegarden og elva, eit areal ved Snikkeriet, eit jordstykke mellom gamleposten og gamle Branntrygdelaget i sentrum, Sørebøen ved Målet, Skålafjæro og Øyro mellom ungdomsskulen og fjordhotellet.

– Må byggja 100-150 bustader i året

Vidare utover fann han eit areal ovanfor Plassaneset, og ikkje minst er det potensiale i å forlenga byggjefeltet i Skeishagen. På Seim trekte han fram det planlagde byggjefeltet Stølen, deretter er det planar for området bak Dimmelsvik bil mot Seimshamrane. Helland minna også om at det framleis er ledige tomter i Åsen.

– Det er ein del tomter rundt omkring. I Rosendal er det mogleg med 306 nye bueiningar innanfor områdeplanen. Så det er eit stort potensiale i bygda. Eg er ikkje bekymra for tilgangen på tomter, eg er meir bekymra for om nokon er viljuge til å ta på seg kostnaden ved å byggja ut, analyserte Helland.

Han la til at grunnideen kring Rosendal er at busetnaden skal vera kompakt, helst med gangavstand til sentrum.

Statsforvaltaren

Øyvind Hardeland fryktar at nokre prosjekt kan møta motstand hjå statsforvaltaren. For å ikkje tapa tid, tilrår han å prioritera det som er mest realistisk å få løyve til.

– Det må finnast areal som er tilgjengeleg, og som ikkje blir stoppa av statsforvaltaren. Vi må prøva å få gjennomført desse planane, slik at vi har gode varer klare til kundane. Alle er velkomne, også feriehus og hytter, sa han.

Oddbjørn Kroka var oppteken av moglegheita til å byggja einebustader.

– Eg saknar dei attraktive einebustadtomtene. Eg hadde ikkje bygd hus utan sjøutsikt i Kvinnherad, kommenterte han.

– Det kan vera fint med einebustader, men her skal det fortettast. Viss det er noko Kvinnherad har mykje av, så er det einebustader. Og så må vi hugsa på at for nesten kvar innflyttar i ei leilegheit, så blir det ledig ein einebustad, kontra Rune Helland.

Må stå på

Etter gjennomgangen var Øyvind Hardeland meir optimistisk, og konkludert at det faktisk finst gode sjansar for vekst.

– Får vi tomtene klare, så kan vi klara det. Men vi må stå på, og det hastar litt, oppmoda han.

Rune Helland avslutta med å presisera at målet om 15.000 innbyggjarar fyrst gjeld frå år 2050.

– Det betyr ein auke på 60 menneske kvart år, og det er vi på veg til å klara, smilte han.