Har kravd inn for mykje eigedomsskatt - vil vurdera 800 eigedommar på ny

– Det vil ta tid å gje eksakte opplysingar om utfallet for den einskilde eigedommen. Me tar sikte på å stoppa innkrevjinga av eigedomsskatt i 3. kvartal, sidan 2. kvartal allereie er sendt ut. Me vil også gjera ei avrekning for året på 4. kvartal. Inntil ein får skriftleg melding om noko anna, må ein difor betala tilsendt rekning, opplyste kommunedirektøren til formannskapet.

Bakgrunnen for denne utviklinga er 12 klagar som kom inn i samband med takseringa av dei 800 eigedommane. Kvinnherad kommune bad då eit advokatfirma sjå på problemstillinga, der konklusjonen var at rettleiaren frå Kommunenes Sentralforbund (KS) tok feil på dette punktet, og burde tolkast feil.

– Utgreiinga kommunen har fått frå advokaten er ikkje testa opp mot KS, men gjer det tydeleg at problemstillinga er større enn for Kvinnherad kommune aleine. Det er heller ikkje rettspraksis på området som klargjer situasjonen, orienterte kommunedirektør Ragnhild Bjerkvik til formannskapet.