– Har kommunen oppfylt informasjonsplikta?

Kontrollutvalet skal drøfta «den blå streken» i strandlinja. Mellom anna ynskjer dei svar på om kommunen har oppfylt informasjonsplikta si, og om politikarane godt nok vart gjort kjende med konsekvensane av kommuneplanvedtaket i 2018.

Då kommuneplanen vart endra i 2018, var det ein god del eigedomar i heile Kvinnherad som brått vart flytta inn i «forbodssona» mot bygging i strandlinja. Dei siste månadane har fleire slike saker vore omtalte. Felles for dei er at tomteeigarane ikkje får byggja der, og at dei ikkje vart varsla av kommunen om endringane.

Førebels sist i rekkja er saka til Svein Helge Eide, som var oppe i forvaltningsutvalet for to veker sidan. Han hadde godkjent nausttomt i ein reguleringsplan frå 2004, men oppdaga tilfeldigvis i vinter at tomta no var flytta inn i forbodssona. Reaksjonane let ikkje venta på seg etter at Grenda omtalte saka.

– Det er nærare ti personar som har teke kontakt med meg etter det oppslaget, opplyser Knut Førland (MDG), leiar i kontrollutvalet.

– Dei fortel om liknande erfaringar som Svein Helge Eide, med andre ord stor overrasking over at tomtegrensene deira plutseleg var blitt endra utan at dei overhovudet var gjort kjende med det, legg Førland til.

To spørsmål

Han avslører at problemstillinga vert tema på kontrollutvalet sitt møte i mai.

– I fyrste omgang vil vi stilla spørsmål til kommunedirektøren. Basert på svara hennar, må kontrollutvalet vurdera korleis vi eventuelt skal følgja saka opp, seier Førland.

Konkret er det to tilhøve utvalet ynskjer svar på:

1. Informasjonsplikta som kommunen har til dei partane som er råka av så inngripande endringar.

2. Var politikarane kjende med desse konsekvensane som no kjem fram då kommuneplanen vart vedteken i 2018?

– Spørsmålet er om den vedtekne kommuneplanen i heile tatt er gyldig, så desse momenta må vi få klarheit i. Mykje tyder på at politikarane ikkje var merksame på konsekvensane, og at desse opplysningane ikkje kom tydeleg nok fram i saka dei fekk til handsaming, analyserer Knut Førland.

Tilbakeverkande kraft

Han stussar elles over at planendringa i 2018 vart gitt tilbakeverkande kraft.

– Etter at byggjegrensa vart flytta, er det i realiteten ein 0-verdi på tomtene. Eigarane har attpåtil betalt eigedomsskatt, seier Førland.

Som kjent har det vore fleire saker innan plan og bygg som har skapt debatt i det siste. Også desse vert truleg tema i kontrollutvalet.

– Det spørst om vi ikkje må sjå på om ting vert gjort på ein god nok måte, og om kommunikasjonen med utbyggjarane er tilfredsstillande. Børneset, Hansalio og fleire andre saker gjer at omdømet til Kvinnherad kommune vert sett på prøve, og det er ikkje bra, seier Førland, som til slutt viser til Leif Ove Mikkelsen (Ap) sitt spørsmål i kommunestyret i mars om politikarane si anledning til å bruka skjønn.

– Administrasjonen bør i større grad informera om moglegheitsrommet som finst i dei ulike sakene. Innanfor det rommet bør administrasjonen dessutan vera framoverlente og prøva å hjelpa utbyggjarane mest mogleg, oppmodar Knut Førland.