Har gjort det vanskelegare å misbruka andre sine mobilnummer

Fenomenet der svindlarar kan tjuvlåna mobilnummeret ditt har fått namnet «spoofing». For mottakaren ser det ut til at det er du som svindlar. Det ser også ut til at samtalen kjem frå eit norsk nummer.

Alle mobiloperatørar har allereie system på plass for å blokkera svindelforsøk frå eigne nummer. Tidlegare i år sende Nasjonal kommunikasjonsmyndighet (Nkom) brev til Telenor, Telia og Ice og bad dei styrka samarbeidet for å stoppa endå fleire svindelforsøk. No har auka samarbeid ført til at mobiloperatørane kan blokkera svindelforsøk hos andre operatørar, uavhengig av kva norsk mobilnett numra høyrer til.

– Det er gledeleg at selskapa no har rapportert at dei har fått på plass betre deling av informasjon og koordinering av «grensekontrollen» på mobiltrafikk som kjem frå utlandet, og som «spoofer» norske nummer. Norge er så vidt vi veit det andre landet i verda som har innført eit slikt digitalt skjold, og har allereie redusert misbruken av norske mobilnummer, seier John-Eivind Velure, direktør i Nkom, i ei pressemelding.

Alvorleg samfunnsproblem

Nasjonal ekspertgruppe mot digital svindel blei oppretta av Nkom i partnerskap med Økokrim i 2023, og samlar myndigheiter og private aktørar til ein felles innsats mot digital svindel. Digitaliserings- og forvaltningsminister, Karianne Tung, seier digital svindel er eit alvorlig samfunnsproblem, og at det er bra at det blir samarbeida godt i ekspertgruppa.

–Vi skal vera trygge når vi brukar mobiltelefonen i kvardagen. Digital svindel er eit alvorleg samfunnsproblem, og no iverkset vi nye tiltak for å gjera mobilsvindel vanskelegare. Vi må arbeide hardt for å få bukt med utfordringa, slik at folk og næringsliv kan ha tillit til den teknologiske utviklinga. Eg har derfor gitt Nkom i oppdrag å leia ei arbeidsgruppe mot digital svindel, og det er positivt at dette arbeidet no gir resultat, sier Tung i pressemeldinga.

Mindre «spoofing»

Etter at den koordinerte digitale «grensekontrollen» kom på plass, har «spoofinga» av norske mobilnummer falt kraftig. Derimot er det tydeleg at tjuvlånet av svenske og danske mobilnummer har auka.

– Det viser at svindlerane er godt organiserte og at dei tilpassar seg raskt. Digital svindel bidrar til å finansiera kriminelle nettverk, råker enkeltmenneske og bryt ned tillita vi som befolkning har til teknologi og til kvarandre. Tillit til digitale tenester er heilt avgjerande for å løysa fleire av samfunnsutfordringane fremover, seier Velure.