– Har gått over all forventning

Etter ei helg med livesending av EM i fotball, var det uvisst om baren kunne halda ope på tysdag. Hendinga trekte nemleg fullt hus, både i semifinalane og i sjølve finalen, og oppstartsproblematikken med å bli utseld for pils vart såleis eit faktum. Likevel får alle dei forbipasserande som spør om det vil vera ope denne dagen positivt svar. Anders Gaute Helvik Kristensen har nemleg fått fylt opp kranene, og opnar dørene rundt tre.

– Det er i grunn ein klassisk oppstartsproblematikk, seier han, og legg til at det har vore god hjelp å få i dei lokale serveringsstadene i Rosendal, noko dei set umåteleg stor pris på.

– Ja, vi hadde jo stor tru på konseptet då vi opna, men oppstarten har vore over all forventning. Det har gått veldig bra, med god respons frå publikum og masse folk. Aller flest lokale, faktisk, legg samarbeidspartner Kjetil Helvik til.

Då siktar han ikkje berre til gjester frå Rosendal, men mange har også funne vegen frå Husnes og Halsnøy.

– Fleire har kome med båt og lagt seg til her, held han fram og peikar ut mot båthamna.

Anders Gaute og Kjetil har etablert konseptet saman, men forutan eit framtidig (tenkt) arrangement kor Kjetil skal briljere med sine enno skjulte bartenderkunstar, er det førstnemnde som er å rekna som ringrev i bransjen, og som vil vera den mest aktive i den praktiske drifta.

– Eg har vel jobba døgnet rundt sidan januar for å lande dette her, men prosessane byrja enno tidlegare enn det, med forretningsplan, budsjett og marknadsundersøkingar, fortel han.

Kjennskap til bransjen

Kristensen kjenner seg godt rusta til å drive ein slik plass, noko han grunngjev med at han kjenner bygda og utelivet her frå innsida.

– Eg har gått livets skule for å sei det slik, har fagbrev som servitør og eg har drive fleire plassar i Stavanger. I nitten pil og boge deltok eg dessutan i konkurransar i bartending, og har ein NM tittel frå denne tida. Elles har eg eit breitt nettverk i bransjen og kjenner bygda godt.

Sjølv om oppstarten må seiast å vera ein suksess, har dei også møtt på ein del utfordringar. Mellom anna har dei kjent på problematikken med å ha uteservering utan tak.

– Det trengs ei persienne her, slik at folk kan sitje ute sjølv om det regnar, slår dei fast, og håpar det let seg løyse i nær framtid.

At serveringsstaden vert samanlikna med Zachariasbryggen i Bergen kan såleis både forklarast med den sjø-nære plasseringa, samt med det same typiske vestlandsvêret.

På solrike dagar er det per i dag rigga til at 42 gjester kan nyta lukta av sjø og instagramvenlege solnedgongar frå uteserveringa. Dette talet ynskjer dei auka, mellom anna ved å utvide terrassen.

– Dette skal vera på plass til neste sommar, informerer Helvik, som elles rosar byggjesaksavdelinga i kommunen for effektiv, løysningsorientert og god sakshandsaming så langt.

God stemning

Målet deira er å skape ein møteplass kor den nye smile-pandemien får gode vekstvilkår.

– Det som er viktig for oss er at folk skal kose seg, at vi kan tilby god stemning, slår Kristensen fast.

For å klara dette legg dei fram tankar frå ein svært variert idebank. Her kan nemnast rorbu, mange ulike artistar, ølkurs og vinseminar, visning av gatebilløp og fotballkampar, samt damenes aften og boblelaurdag.

– Lokkar de ikkje damer med fotball, altså?

– Dei som er interesserte i fotball kjem nok, men boblelaurdag med prosecco slår kanskje betre an, spår Anders Gaute, før han held fram: og alle veit jo kva som skjer dersom damene kjem...

Sjølv om oppstartsutfordringane i stor grad har vore knytt til eit formidabelt besøk, har dei også hatt erfaringar av den mindre kjekke sorten. Mellom anna har nokre av utemøblane blitt funne rundt om i sentrum, og det har blitt gjort hærverk på toalettet. Dette har ikkje bar-eigarane noko til overs for, og vonar at sambygdingar og andre gjester er solidariske og backar opp om den nye møtestaden.