Har fått sykkelen tilbake: – Har noko å gjera med kor me bur

– Eg fekk mange meldingar om innlegget på Kvardagsprat, og såg at det kunne vera min. Det var jo ikkje sikkert at det var min sykkel det var snakk om, men samstundes er det jo grenser for kor mange andre sin det kunne vera, fortel Gunnar til Grenda.

Han ringte mor si, for han visste at søstera hadde lånt sykkelen derifrå tidlegare på dagen.

– Mamma bad meg vera vidare på skulen, men eg ringte pappa, som jo gjorde sitt, smiler han nøgd.

Stal sykkelen til Gunnar i Omvikdalen – tatt av UP på Løfallstrand

Gunnar går første året på byggfag på KVV, og syklar frå Seimshamrane og ned til Best-stasjonen kvar morgon. Det går fort, ettersom det stort sett er ulike grader av fritt fall frå huset til busstoppen. Han har landevegssykling som fritidsinteresse, så det blir ei lett treningsøkt å sykla seg heim igjen når skulebussen kjem tilbake til Omvikdalen.

– Sjølve sykkelen er det jo litt verdi i, men det er ein sykkel som eg har hatt lenge, som eg har oppgradert og vedlikehalde gjennom åra. Så det er jo ein sykkel eg har lyst å behalda, seier han.

Gunnar er overraska over at så mange varsla han om dette tjuveriet.

– Det har noko med at me bur her me bur, trur han.

– Og så var det litt morosamt å høyra korleis pappa stoppa utanlandske bilar på veg frå Sunndal og heimover, sluttar 16-åringen.