Har endeleg kapasitet på passkontoret igjen
Etter ein hektisk vår og sommar, med blant anna passkundar frå både Austlandet og Bergens-området, har Hardanger politistasjon endeleg god kapasitet på passutskriving igjen.
Publisert
– Me har no mykje ledig kapasitet, og eg vil tilrå å bestilla seg timar til pass hos oss igjen. Eg vil samstundes tilrå publikum å vera litt føre var før våren kjem igjen, for då vert det erfaringsmessig vanskelegare å finna ledige passtimar, seier Vidar Øiestad.
Han er førstekonsulent ved Hardanger politistasjon, og har ansvaret for passutskrivinga ved stasjonen
Annonse
Han fortel om pågang til stasjonen frå både Austlandet og Bergen-området.
– Det har vore eit køyr på dei tilsette i sommar, og det har gått i eitt frå morgon til kveld, men me har ytt så godt me har kunna. Det er om rolegare dagar no, men leveringstida for pass er likevel no opp i ti veker, etter ein har tatt bilete og fingeravtrykk ved stasjonen. Eg kan også nemna at produsenten er nøyen på formalitetar. Det kjem tekstmelding frå oss ved innkallinga med lenke til kva ein må ha med. Ein må ta med gamalt pass, og ha med fullmakt når det er snakk om pass til barn, seier Øiestad.
Ein kan bestilla pass via politiet.no, og deretter søkja på Hardanger politistasjon. Ein må framleis velja enten nasjonalt id-kort eller pass.
– Id-kortet kjem kjappare, etter 2-3 veker. Dette kan ein reisa med til EU- og Schengen-land, men hugs Storbritannia ikkje er inne i dette samarbeidet, minner Øiestad om.
