– Har ein ei helsebekymring så skal ein sjølvsagt ta kontakt

Då Norge stengte ned for eit par veker sidan, gjorde også legekontoret i Rosendal det same. No mjukar dei opp på nokon av tiltaka og tek i mot pasientar til vanleg kontroll og legetimar igjen.

– Så sant ein ikkje har luftvegssymptom, så tek vi i mot pasientar til vanlege legetimar. Men vi har gjort det sånn at vi ikkje set opp så mange timar som før. Folk skal ikkje bli sitjande og venta i venterommet, så vi set med det av meir tid til kvar konsultasjon enn før, seier Trygve Torjusen.

Det gjer dei for å syta for at helsesenteret til kvar ei tid er smittefritt og at færrast mogleg er inne til kvar ei tid.

– Det fører til at kvardagen vår vert rolegare, det er færre pasientar innom og det går i eit lågare tempo. Men det er heilt nødvendig. Vi må leggja opp dagen slik at vi er klare om det skulle komma inn akutt sjuke. Får vi inn nokon som er akutt sjuke, så må vi på med smittevernutstyr og følgja dei strenge retningslinjene vi har sett til oss sjølv. Det betyr at ein sjekk som før tok 15 minutt no tar ein time, seier Torjusen.

 

Må tåla meir

Legekontoret i Rosendal går no meir og meir tilbake til normal drift. Men dei vil halda fram med strenge prioriteringar.

– Vi bed om at folk venter med ting som ikkje er nødvendig. Samstundes så skal folk som engstar seg sjølvsagt koma. Ingen skal gå rundt og vera redde for at dei har ein alvorleg sjukdom. Dei skal òg vera sikre på at huset her er smittefritt, så vi er heilt avhengige av at folk ikkje berre dukkar opp. Ein må ringa å avtala time på førehand, seier Torjusen.

– Kva meiner du med ikkje nødvendig?

– Ein kan godt venta med ein vond rygg, eit vondt kne eller ein vond arm. Blir smertene varige så skal vi sjølvsagt ta det på vanleg måte, men i desse dagar må vi kanskje tåla litt meir enn tidlegare. Men har du brystsmerter og lurer på om du har hjarteinfarkt eller er redd og engsteleg så skal vi utgreia det på same måte som før. Har ein bekymringar så må ein ta kontakt, seier Torjusen.

 

Tapar inntekt

Dagane er blitt annleis, der mykje av den menneskelege kontakten er byta ut med e-konsultasjon og telefonsamtalar.

– Dessverre så hadde vi midt oppe i dette her problem med datasystemet vårt. Så det var ei veke der ein del e-meldingar ikkje kom fram, det skjedde utan at vi fekk noko feilmeldingar på det, seier han.

Så om du har teke kontakt med legen din digitalt utan å få svar, kan det vera grunnen. Men problemet skal vera fiksa no.

Med færre pasientar innom, mistar også legane ein god del av inntekta si.

– Alle legane i Kvinnherad er sjølvstendig næringsdrivande. No når vi får færre pasientar inn, så merke vi sjølvsagt at inntekta går dramatisk ned. Men vi må halda hjula i gang, det er bruk for oss i denne tida her. Så sjølv om det er vanskeleg no, så veit vi at det er bruk for oss no og at det vil vera bruk for oss når denne perioden er over, sluttar Torjusen.