Har du symptom? Test deg!

– Alle med symptom må testa seg, seier kommuneoverlege Glenn A. Opland.

Oversikten til kommuneoverlegen viser at det dei tre føregåande vekene har blitt testa høvesvis 100 (veke 51), 79 (veke 52) og 82 (veke 53) personar i Kvinnherad.

– Me har god testkapastitet i Kvinnherad. Det er lagt opp til 50-60 til dagen, men me kan fint pressa oss opp i 90 testar til dagen om det trengs, opplyser kommuneoverlege Glenn A. Opland.

Koronavaksinen kjem til Kvinnherad på onsdag.

– Me byrjar med langtidspasientane på Husnestunet først på torsdag, så helsepersonell, legevakt, og så vidare. Me er godt rigga med vaksineringspersonell, seier Opland.

 

Ikkje ein dråpe til spille

I kva rekkjefølgje helsepersonellet skal få vaksinen blir avgjort etter nøye utrekning.

– Kva einskild blir «scora» ut frå smitterisiko, kor vanskelege dei er å erstatta og behov for dei ved høgare smittetrykk. Dette er måten me må gjera det på. Det vil ta tid å få vaksinert alle, understrekar han.

I første sendinga kjem det åtte flasker, røft 40 dosar.

– Me får fem til sju dosar ut av kvar flaske. Ikkje ein dråpe skal gå til spille, lova Bjerkvik.

I veke to er 65 nye dosar vaksine meldt inn.

Den nye smittesporingsappen er klar. Kommuneoverlegen oppmodar deg til å ta han i bruk.

– Den bør folk lasta ned og bruka. Denne ivaretar personvernet på ein annan måte enn den førre. Han fungerer slik at melder ein inn at ein er smitta, så sender appen melding til alle som har hatt sin telefon så eller så nær din telefon. Alle opplysingar vert kryptert og koda, opplyser kommuneoverlegen.