– Har de fått inn neglesaks?

Då Grenda var innom hadde elevar frå klassen sete og teke i mot posar med klede og utstyr i om lag ein halv time. Allereie då var det levert inn ein haug med saker frå medelevar, administrasjon og kantine-personalet.

– Me har tatt utgangspunkt i listene som Kvinnherad frivilligsentral har lagt ut, og det er tinga som står der me har spurt etter. Men me har ikkje opna posane for å sjå kva me har fått inn, seier elevane Mia Huke Hjelmeland og Tuva Hatteberg-Olsen.

Dei kunne såleis ikkje svare dei nyfikne medelevane på om det var kome inn neglesaks eller ikkje.

Ideen kom etter at 1HOA, altså vg1 helsefag, hadde om berekraft og fast fashion. I timane vart det fokus på forbruk, og elevane ønskte å sjå over kva dei eigentleg hadde.

Stort engasjement

Det eine førte til det andre, og brått bestemte dei seg for å leggja noko av det dei ikkje trengte til sides, og hjelpe dei som har reist frå det meste dei eig; flyktningane.

– I staden for at berre vår klasse var med, ville vi invitera med heile skulen, fortel dei.

Lærar Catalina Sweers Jimenez påpeikar også at fleire av innsamlingsaksjonane tek sikte på å køyre utstyr til Ukraina.

– Men så tenkte vi at det kjem jo flyktningar hit og, så kvifor ikkje bidra til at dei får det dei treng, seier ho.

Gjengen som har stilt seg opp i kantina slår fast at det at krigen er så nær, gjer noko med oss.

– Det er eit stort engasjement for Ukraina, og eg trur det har noko med at at er så nært oss at så mange har så veldig lyst å hjelpa, seier Liven Santiago, som er ei av dei som sit der.

– Ja, og alle kan jo gjera litt, legg Ylva Dahl Sindradóttir til.

Fleire av medelevane til initiativtakarane meldte at dei hadde gløymt seg ut, og klassen legg difor mogleg opp til ein ny innsamlingsdag, med same føremål, etter påske.