Har bestemt kven som skal til finaleintervju

Fyrste intervjurunde er ferdig, og tilsetjingsutvalet har avgjort kva kandidatar som kjem til finalen i kampen om å bli ny kommunedirektør.

Torsdag var tilsetjingsutvalet samla for å intervjua kandidatar til stillinga som kommunedirektør. I den samanheng har to av medlemmene i formannskapet bedt om å få vurdert sin habilitet. Ordførar Hilde Enstad (Ap) stilte spørsmål om ho kunne vera med i tilsetjingsprosessen sidan partikollega og formannskapsmedlem Leif Ove Mikkelsen er blant søkjarane. Tilbakemeldinga frå juristane i KS er at Enstad er habil.

I tillegg har Leif Ove Mikkelsen bede om å få vurdert sin habilitet til å handsama politiske saker i denne perioden, og også han er habil er konklusjonen.

Spennande kandidatar

– Vi har hatt ein spennande dag og møtt spennande kandidatar. Vi har no valt ut kven som skal vera med vidare til finaleintervju, som vil bli gjennomført i løpet av kort tid, opplyste Enstad til formannskapet torsdag ettermiddag.

Ho føreslo også å flytta neste kommunestyremøte frå 16. til 23. februar, slik at politikarane kan rekka å tilsetja ny kommunedirektør i februar. Dette fekk ho full tilslutnad til.

Det er kjent at fem personar har søkt på stillinga. To av dei har fått namnet unnateke offentlegheit, medan dei tre andre er Leif Ove Mikkelsen, Ivar Konrad Lunde og Adriaan Schönhage. Fire andre trekte søknaden sin då dei ikkje fekk vera anonyme.