Har bede om fleire opplysningar i tilsynssaka ved Rosendal Fjordhotel
Arbeidstilsynet har behov for fleire opplysningar frå hotellet før dei kan gjera ei vurdering i saka. No har dei etterlyst dokumentasjon som kan belysa arbeidsbetingelsane ved verksemda i perioden mellom mai og juli 2022.
Publisert
Sist oppdatert
Arbeidstilsynet har kravd innsyn i arbeidsavtalar, lønnsslippar og timelister. Arbeidsavtalane som er sendt inn er datert i perioden 12. juli til 15. juli 2022.
For at dei skal kunna gjera ei vurdering om verksemda føl arbeidsmiljølova har dei bede å få tilsendt fleire dokument i saka.
Annonse
«Dei arbeidsavtalane vi har motteke er datert i perioden 12.07.2022 til 15.07.2022. Lønnsslippane og timelistene vi har motteke gjelde for perioden 16.05.2022 til 13.07.2022. For å få et reelt bilete av kva for arbeidsbetingelsar som var avtalt i den perioden lønnsslippar og timelister gjelder for, ber Arbeidstilsynet om å få tilsendt arbeidsavtalar som var gjeldende for perioden 13.05.2022 til 13.07.2022», skriv sakshandsamarane i eit oppfølgingsbrev som Grenda har fått innsyn i.
Kort frist
Kravet om ytterlegare opplysningar gjeld for det same utvalet av arbeidstakarar som Rosendal Fjordhotel tidlegare har blitt kravd opplysningar om, altså elleve av dei tilsette. Dei sju som sa opp jobbane sine mellom juni og august er ikkje blant desse.
I følgje oppfølgingsbrevet hadde Rosendal Fjordhotel kort frist på seg til å levere inn desse dokumenta. Brevet var datert 2. september, og fristen frå Arbeidstilsynet var 7. september.
Annonse
Det er oppretta sak om arbeidsbetingelsane ved Rosendal Fjordhotell etter at leiar for hotell- og restauranttilsette i Fellesforbundet i Hordaland, Devjat Hisenaj, meldte ifrå om uhaldbare tilstandar ved verksemda i juli.
