Har avdekt sju driftsavvik ved SIM Svartasmåget
Statsforvaltaren i Vestland har gjennomført tilsyn ved deponi som viser at fleire anlegg har store manglar ved drifta. Dette gjeld også for Sunnhordland Interkommunale Miljøverk IKS, som handsamar avfallet frå Kvinnherad.
Publisert
Sist oppdatert
Under tilsynet ved avfallsdeponiet i Svartasmoget på Fitjar, er det nemleg rapportert om sju avvik og ein merknad. Følgjande avvik vart avdekka under inspeksjonen som fann stad den 26. og 27. mai i vår:
1. Verksemda har deponert avfall som ikkje oppfyller mottakskriteria og som har mangelfull basiskarakterisering
Annonse
2. Lagring av avfall på deponiet skjer ikkje i tråd med vilkåra for anlegget
3. Oppsamling, overvaking og handtering av sigevatn er ikkje i samsvar med krav i løyve
4. Overvaking av deponiet har manglar
5. Verksemda har ikkje tilstrekkeleg oversikt over deponiutviklinga
Annonse
6. Verksemda sørger ikkje for at utslepp av deponigass er lågast mogleg
7. Risikovurderinga har manglar
Observasjonar frå tilsynet
Mellom anna er det levert inn farleg avfall (13. januar, 2021), som er registrert som ordinært avfall. Klassifiseringa er, av SIM, grunngjeve med at «Oppsopet er analysert på tungmetaller og TOC. Utlekkingstester er utført, så sink frå utlekking indikerer oppsopet for ordinært avfall.»
Statsforvaltaren understrekar i rapporten at informasjonen i basiskarakteriseringa er feil: «Klassifisering av avfall skal gjerast på grunnlag av innhald av farlege stoff, og ikkje på grunnlag av utlekking.»
I rapporten vert det difor konkludert med at verksemda har mangelfull kunnskap om krav i avfallsforskrifta til klassifisering og basiskarakterisering av avfall.
Annonse
Vidare viste inspeksjonen mellom anna at det ikkje var gjort greie for om deponerte jordmassar og kompost var forureina eller ikkje. Likeins mangla verksemda ei samla oversikt over deponiet si utvikling, som kor det er lagt avfall og kva avfallsvolumet er. Endeleg observerte også inspektørane følgjande: «Det var ikkje oppdatert risikovurdering av fare for utslepp frå deponiet til vassdrag, grunn og luft.»
Merknaden var at verksemda bør vurdere om det er mogleg å redusere mengda overvatn til sigevass-anlegget.
Lokal aksjon for tilsyn med avfallsdeponi
Inspeksjonane har hatt som mål å kontrollere om gjeldande krav som er fastsette i eller med heimel i forureiningslova, blir overhaldne. SIM IKS pliktar å rette opp avvika som er omtalte i rapporten så snart som råd. Statsforvaltaren ønskjer ei skriftleg utgreiing «som viser korleis avvika er retta og kva tiltak som er gjennomførte eller planlagde» innan 31. desember i år.
Avfallsdeponia som har fått tilsyn i 2021 er Etterdrift av Rådalen avfallsdeponi (Bergen), Franzefoss gjenvinning (Øygarden), Mjelstad avfallsdeponi (Osterøy), Ngir Kjevikdalen avfallsdeponi (Alver), Ivahola avfallsplass (Gloppen) og SIM Svartasmåget (Fitjar).
