– Har altfor mykje å gjera

Administrasjonen har så mange planar å jobba med, at det er vanskeleg å få god nok framdrift på alle.

Då planutvalet hadde møte førre veke, vart kommunen sin planstrategi for dei komande åra diskutert. Der er det omtala så mange planar at Asbjørn Skår (Ap) undra om det er bemanning nok til å gjennomføra alt.

– Slik det er no har vi altfor mykje å gjera. Men det er vanskeleg å seia at «dette legg vi vekk», for alt er like viktig, sa avdelingsleiar Kjartan Thorsen.

Han meiner det difor bør gjerast tøffe prioriteringar.

– Det er vanskeleg å prioritera vekk ting vi allereie har sett i gang. Og kjenner eg politikarane rett, vil det også koma nye ynske. Men politikarane har moglegheit til å gå inn og seia kva vi skal prioritera, opplyste Thorsen.

– Viss det ikkje kjem fleire bestillingar, så jobbar vi med det vi har, og har då nok for fleire år, supplerte kommunedirektør Ragnhild Bjerkvik. Ho la til at ein sjølvsagt er opne for det som måtte koma inn av nye prosjekt.

– Administrasjonen bør vera tydelege på at om noko skal inn, så må noko ut, oppmoda Asbjørn Skår.