Håpar på kantinedrift før jul

Gunn Berit Sandnes Fosse fortel at interessa har vore god, og at dei no jobbar med å formulere anbodet som skal sendast ut til dei interesserte.

– Me har totalt hatt seks aktørar innom, alle frå Kvinnherad. Dei vart vist rundt og me gjekk gjennom informasjon om kantindrifta. Me har opplevd at dei som har vore her har vore veldig interesserte, sett løysingar og vist vilje til kreativitet, seier Fosse til Grenda.

Fram til juni var det eining for matforsyning som forsynte folk og møte på rådhuset med mat. Då måtte eininga fokusere på kjerneoppgåvene sine, som er å levera mat til institusjonar, og ressursane strekte ikkje til å samstundes halda fram med kantinedrifta.

Det daglege brød

Kva verdi det vil vera på jobben har dei ikkje noko estimat på, mykje fordi at kundegrunnlaget har vorte dempa etter korona, og dei som har arbeidet sitt der har blitt vande med å ta med sitt eige daglege brød.

– Det har difor vore veldig vanskeleg å verdsetja. Det me har kontroll på er jo møtekalenderen vår, så når det gjeld møtemat veit me om lag kva som trengs. Elles er det administrative møte, samt rein kantinedrift. Det er vanskeleg å sei kor mange som vil nytta seg av eit slikt tilbod. Besøkande kan jo òg kjøpe seg mat i kantina, så me må freiste å få opp att kundegrunnlaget, held ho fram.

– Kva tid ventar de å få opp att drifta?

– Det tek litt tid å avklara kven som får jobben, og dernest må dei jo få tid til å rigga seg til, så det er nok ikkje realistisk å håpa å ha drift igjen før det nærmar seg jul, seier Fosse, og held fram.

– No skal me vonleg senda ut anbodet til dei som har meldt si interesse tidleg neste veke, og dernest går det litt tid til å avklara spørsmål som måtte dukka opp.

Anbodet blir i desse dagar ført i pennen av innkjøpsansvarleg i kommunen Jorunn Karin Furdal, og fristen for å koma med eit tilbod på dette er framleis ikkje sett.