Håpar på førjulshjelp frå kommunen

Straumrekninga for november vart på litt over 2000 kroner. Sidan den tid har temperaturen gått ned, medan straumprisen har galoppert motsett veg. Sæbø har mellom anna avstått frå å nytta komfyren dei siste vekene, for å hindre at straumrekninga for desember blir uhandterleg.

– Eg bur i ei leilegheit der straum er den einaste kjelda til oppvarming, og når prisane er så høge som no, må ein spara der ein kan. Ein går rundt med ei uro om kva neste rekning vil koma på. Det er mange som er i same situasjonen som meg, og dei fleste må nok spare der dei kan. Men å sitja og frysa er ikkje noko kjekt, konstaterer Sæbø.

Veit kva det vil sei å ikkje ha pengar

Sidan 2016 har Gunnhild budd i ei leilegheit på Valen. I juli i år vart ho uføretrygda, etter fleire år der ho har levd av ordningar som sosialstønad og arbeidsavklaringspengar. Ho har ikkje vore i arbeid sidan 2013, og slår sjølv fast at ho verkeleg veit kva det vil seie å ikkje ha pengar.

Å endeleg verta løyvd uføretrygd gav ho ein økonomisk tryggleik. Samstundes kjenner ho seg avskilta, ei kjensle som ikkje er særskilt god. Med uføretrygda får ho såleis nokre hundrelappar for mykje i månaden til å få bustønad, noko som har ført til at ho er blant dei som ikkje får ekstra hjelp av regjeringa i desember.

– Dette gjeld også andre grupper som ikkje blir dekka av bustønadsordningane; dei som går på arbeidsavklaringspengar, pensjonistar, åleineforsørgjarar med eller utan born, samt alle som jobbar i lågløna yrke, forklarar Sæbø.

Auke i bustønad, ikkje i sosialhjelp

Grunna dei høge straumprisane la regjeringa 8. desember fram forslag for Stortinget om å auke bustønaden frå og med desember 2021, til og med mars 2022. Forslaget inneber at dei som mottek bustønad i denne perioden skal få 1500 kroner ekstra kvar av månadane. Husstandar der det bur meir enn ein person, skal i tillegg få 150 kroner per ekstra person, og om det blir vedteke vil den første ekstrastønaden bli utbetalt allereie 20. desember.

Då dette tiltaket treff mange, men ikkje alle, vart det samstundes føreslått at kommunane i 2022 skal få ei auka ramme på 100 millionar kroner til sosialhjelp. Kommunane har nemleg plikt til å vurdere sosialhjelp til dei som ikkje kan sørgje for livsopphald, og regjeringa reknar med at fleire vil ha behov for sosialhjelp framover.

Håpar det kan drypa litt frå kraftfondet

Forslaget for korleis desse ekstra kommunale midlane vil fordelast er enno ikkje lagt fram, og Sæbø føl nøye med på utviklinga i saka.

– Dei som allereie har bustønad eller sosialhjelp i dag får ekstra støtte no i desember. Men vi andre får ikkje noko økonomisk hjelp før eventuelt i januar. Difor vil eg oppfordra kommunen, med ordføraren i spissen og kommunestyrerepresentantane, til å visa at Kvinnherad er ein Ja-kommune, og gi noko av overskotet frå kraftfondet til innbyggjarane no i desember. Det treng ikkje vera mykje, ein tusenlapp ville hjelpt mykje, føreslår Sæbø.

Ho peikar vidare på andre kommunar som har bestemt seg for å bidra med pengestøtte til sine innbyggjarar i desember, som Sirdal og Valle i Setesdal, og meiner ordningane der er eksemplariske.

Kvinnherad kommune ønskjer å bruka 120.000 kroner på ekstra sosialstønad i desember, og saka har nyleg vore på sakslista til både kommunestyret og formannskapet. Men førebels er det ikkje klart korleis dette eventuelt skal bli finansiert.

Sæbø kryssar fingrane for at dei finn ei løysing.

– No når eg har spart litt inn på middagskoking, håpar eg at eg kan ta det litt igjen i jula. Det å vita at eg kan ha på litt varme gjer det jo flott, og eg håpar det blir ei fin jul.

Set stor pris på den lokale julegåveaksjonen

Jula skal Gunnhild feire saman med mora, og det vert anten ribbe eller kalkun på menyen. Samstundes vil dei få noko ekstra å kose seg med frå julegåveaksjonen, som Kvinnherad frivilligsentral har initiert i lag med andre frivillige og ulike tenester i kommunen. Der kan alle som har behov for hjelp til jul ta kontakt.

Gunnhild har meldt inn nokre ønskje til aksjonen.

– Ein er jo langt frå kravstor. Eg har mellom anna spurt om nokre te-lys og litt godteri, konfekt eller noko. Eg fekk julemat gjennom ordninga i fjor, så det kan jo hende det er ein moglegheit for det i år òg. Utdelinga skjer i juleveka, så det blir spanande å sjå kva me får, sluttar Sæbø.

Dei som ønskjer å bidra til årets julegåveaksjon kan ta kontakt med Kvinnherad frivilligsentral.