Håpar på éin ekstra rundtur i Fjelbergruta

Sidan hausten 2023 har Fjelbergruta hatt ein mellombels justert ruteplan. Bakgrunnen er reiarlaget Norled sine utfordringar med å behalda mannskapa etter at Sjøfartsdirektoratet stramma inn praksisen for å gje dispensasjon frå kviletidsreglane.

«Ved å justera ruteplanen for sambandet har ein vore i stand til å behalda mannskapa sin skiftplan, slik at ein ikkje kjem i konflikt med kviletidsreglane. I perioden frå hausten 2023 og fram til no er det ikkje registrert klager frå verken reisande eller Kvinnherad kommune, dette etter at ruteplanen vart justert», stod det i sakspapira til fylket sitt Hovudutval for samferdsel og mobilitet sitt møte i Solund i slutten av august.

Endringa i ruteplanen handlar fyrst og fremst om når og kvar sambandet startar og avsluttar dagen.

«For at kviletidsreglane for mannskapet skal vera varetekne, har ein endra fyrste avgang frå Borgundøy frå klokka 05.15 til klokka 05.35. Vidare er siste innkomst på kvelden endra frå klokka 22.00 til klokka 21.15, dette også på Borgundøy», vert det opplyst.

Fylkesdirektøren la fram innstilling om at den mellombelse ruteplanen blir gjort permanent. Dette vart samrøystes vedteke. Fjelberg Grendalag har uttalt seg positivt til forslaget. Ruteendringa medfører elles reduserte driftskostnader for fylkeskommunen på mellom 500.000 og 800.000 kroner.

Kompensasjon

I utvalet sitt møte sette Marianne Nordhus fram forslag om at det, som kompensasjon for kortare opningstid i sambandet alle vekedagar, vert det lagt inn ein ekstra tur/retur Fjelbergøyane-Sydnes laurdag kveld. Dersom då dette let seg gjera utifrå kviletid og den økonomisk ramma. Konkret lanserte ho avgang frå Borgundøy klokka 18.30 med ankomst Sydnes 18.50. Deretter frå Sydnes klokka 18.55 med ankomst Borgundøy 19.15. Også dette vart samrøystes vedteke.

Saka om Fjelbergruta skal opp i fylkesutvalet 19. september.