Håpar hjortekjøtnæringa kan styrkja lokal verdiskaping

På «Landbruket i Kvinnherad» si Facebook-side vert det informert om at Kvinnherad kommune deltek i eit nytt klyngeprogram «Hjortekjøt som næringsveg». Programmet har som føremål å utvikla og styrkja hjortekjøt som næring og inneber kjøt frå både jakt og oppdrett. Dei skriv vidare at det er potensiale for vekst i næringa, men at rammevilkåra ofte blir oppfatta som ei hindring.

– Vi har hatt eit par møte og er i startfasen. Programmet fokuserer på å utvikla både regelverket og næringa, slik at fleire startar opp og ser mogelegheitene som hjortekjøt byr på, seier landbrukskonsulent Karen Løvfall Våge.

Et samarbeidsprosjekt

Eit klyngeprogram vil seia at fleire ulike aktørar går saman om å bidraga til verdiskaping gjennom berekraftig innovasjon.

– Dette er eit samarbeidsprosjekt mellom fleire ulike verksemder, blant anna Norsk Hjortesenter, Fylkeskommunen, Statsforvaltaren, viltbehandlingsanlegg, slakteri, hjorteoppdrett og foredlingsbedrifter fortel Løvfall Våge.

Hjortekjøt som ei tilleggsnæring innan landbruket skal få eit meir politisk fokus. I tillegg skal mogelegheitene til hjortekjøt som næringsveg synleggjerast og prosjektet skal kopla hjortekjøt tettare saman med lokalmat- og reiselivsnæringa.

– Ei nettside der ein kan få meir informasjon om prosjektet er under arbeid. Vi vil invitera til eit informasjonsmøte etter sumaren, der blant anna ein frå eit viltbehandlingsanlegg vil bidra med informasjon og eigne erfaringar. Vi håpar på mange interesserte og eit godt oppmøte. Det er berre å ta kontakt om ein har nokon spørsmål, avsluttar Løvfall Våge.