– Håpar å vera klare i juni

– Me er framleis litt i tenkemodus, og har masse tankar og idear oppi hovudet som me ikkje heilt vil fortelja om endå, seier ei litt nølande Reidun Sjo, då Grenda tek kontakt for å høyra om kva planar dei har for bensinstasjonen.

Det var Kvinnheringen som fyrst omtala saka i eit intervju med paret.

Tilbake i familien

– Me vart eigentleg litt overraska då me vann bodrunden, men sjølvsagt veldig glade. Me er godt nøgde med prisen me vart einige om, seier ho vidare, utan å vilja utdjupa det noko nærmare.

Bensinstasjonen var i mange år drive av familien til Reidun, og ho fortel at det er kjekt at den no er tilbake, etter nokre år i andre hender.

– Lokalet ligg i eit veldig fint og lett tilgjengeleg område, i tillegg ligg det ganske nært området vårt der me driv hytteutleige, så då blir det lettvindt å gå opp hit for å handla, fortel ho.

– Det er også veldig hyggeleg at det ser ut til å vera ein naturleg samlingsplass for ungdomane i bygda, fortel ho vidare.

Ho presiserer derimot at det kjem til å bli meir ein kafé enn ein kiosk.

– Me kjem nok til å ha ein del gatekjøkenmat, kanskje litt fisk og fiskesuppe også, men me ynskjer ikkje på nokon måte å utkonkurera pizzeriaen, seier ho, og refererer til Khaleel Saber Mohammed Zengana, som nyleg opna ein pizzarestaurant i Sæbøvik.

– Han er kjempeflink på pizza, og det er veldig kjærkome å ha fått ein pizzeria i bygda, understrekar ho.

Simonsen Bensin på Sæbøvik stenger dørene

Nokre ting er spikra

Dei må ha planane klare til dei overtar 1. mai, for det er mykje arbeid som må gjerast, i fylgje Sjo.

– Det meste må pussast opp, meir enn me fyrst trudde faktisk. I tillegg må me skaffa nytt inventar og slikt, og det kan vera veldig dyrt. Kanskje er me heldige og finn noko bra kjøkenutstyr i rustfritt stål brukt, men då må det vera i tipp topp stand, fortel ho.

– Håpet er å vera klare til opning i juni ei gong. Kanskje me klarer det, fortset ho håpefullt.

Trass i at mykje endå er på planleggingsstadiet, så er det nokre ting dei har bestemt seg for. Blant anna så skal bensinpumpene fortsetje slik dei er i dag.

– Me skal framleis ha kortautomat, og ein skal sleppe å gå inn for å betala. Ein kjem heller ikkje til å kunne ha noko konto inne hjå oss, forklarer Sjo.

– Det kjem nok heller ikkje til å bli noko særs med slike typiske bensinstasjonsvarer å få kjøpt, som til dømes spylarvæske og den type ting, i og med at me kjem til å satsa meir på kafédrift, fortel ho vidare.

Av same grunn kjem dei heller ikkje til å ha tidleg opning, men meir utpå føremiddagen ei gong, får me opplyst.

– Me ynskjer også å få til ein stad nede på kaia der turistane kan fylla bensin til båtane sine, utdjupar Reidun.

– Det er ein veldig flott og anvendeleg stad, og me har som sagt mange tankar og idear, men me tenkjer at mykje kjem til å byggja seg fram sjølv med tida, avsluttar ho.