Håpar å opna trekket neste helg – fine tilhøve i ljosløypa

Viss vêrmeldingane er korrekte, vil truleg alpinbakken til Fjellhaugen skisenter opna neste helg.

Snøen er endeleg kome til det lokale alpinsenteret. Både naturleg og kunstig snø.

– Vi har fått tak i to nye, svære snøkanoner. Den eine er i bruk, medan den andre må tilretteleggjast meir, for den skal vera lengre oppe i bakken. Den fyrste produserer no snø som berre juling, og det skal han fortsetja med gjennom helga, opplyser Steinar Albrethson, dagleg leiar i Fjellhaugen skisenter.

– Vi opnar neste helg, viss vêrmeldingane står oss bi, legg han til.

– De har vel fått ein del naturleg snø også?

– Ja, det har kome ein god del. Utfordringa er at det er veldig varmt under snøen. Det har vore null frost tidlegare i vinter, og så regna det mykje før frosten kom. Difor er det mykje vatn i terrenget, men vi skal få det til viss berre vêret held seg. Ifølgje varselet er det nesten ikkje raudt (plussgrader) dei neste 21 dagane, så det ser lovande ut, seier Albrethson, som lovar å halda innbyggjarane oppdaterte via Facebook.

Fagnabu

Også for dei som føretrekk bortoverski kan han koma med gode nyhende.

– Det er veldig fint i ljosløypa, og der blir det preppa kvar dag. Vi skal også trakka opp til Fagnabu (dagsturhytta) så snart det er tilhøve til det. Eg har to mann på snøscooter opp til hytta akkurat no for å sjekka tilhøva. Eg var der sjølv for eit par dagar sidan, men då var det for vått, fortel Steinar Albrethson.

Han kryssar fingrane for at sesongen snart er i gang.

– Det hadde vore greitt om vi fekk ein god start etter gamalt, smiler han.