Håpar å få oppdatert styringssystemet anno 1973

Nyleg fekk Fjellhaugen Skisenter ein god skjerv på vegen av SpareBank 1-stiftinga i Kvinnherad. Men sjølv med ein sjekk på 600.000 kroner er dei enno ikkje i mål.

Nytt styringssystem har nemleg ein pris på nær 900.000, og dei manglar enno i underkant av 300.000 kroner for å få dette på plass.

Styringssystem: rota til mykje godt i alpinbakken

Eit styringssystem er det systemet som driv motoren som fraktar skientusiastar til topps i trekket, slik at dei som vitjar alpinbakken kan få oppleve skiglede, meistring og litt fart og spenning.

Spleisen er oppretta i håp om å koma eit stykke nærare målet, utan å tøme det dei har disponibelt på kontoen per i dag.

– Då har vi ikkje meir igjen til vedlikehald, og då er ein like langt, skriv Fjellhaugen Skisenter i prosjektskildringa på Spleis.

Vil unngå å gå glipp av ein heil sesong

No håpar difor dugnadsgjengen at innbyggjarane tek spanderbuksene på, og blir med på spleiselaget.

– Dagens styringsystem er frå 1973, og i 2022 kan ein sei at den teknologien er noko utdatert. Skulle noko ryke i styringssystemet så er det ikkje råd å få fatt i nye komponentar. Og med ei leveringstid på meir enn 6 månader på nytt system kan det i verste fall gjere at vi går glipp av heim heil sesong, opplyser dei.

Dugnadsgjengen har førebels sett eit fleksibelt mål på å samle inn 100.000 kroner i løpet av dei neste 30 dagane, og dei første bidraga er allereie kome inn.