Hans Inge Myrvold ute på siste NRK-måling
Fredag offentleggjorde NRK det dei omtalar som ei supermåling for alle valkrinsane i landet. Den viser at 3. plass på Senterparti-lista ikkje er nok til stortingsplass.
Publisert
Sist oppdatert
Ved valet i 2017 hadde Senterpartiet 7,6 prosent av stemmene i Hordaland. På målinga gjort i august i år kjem Sp ut med 11,8 prosent oppslutnad i Hordaland. Det er likevel berre nok til å få inn to mandat, og Hans Inge Myrvold blir då første vararepresentant for partiet. Kvinnherad-ordføraren tar det med stor ro.
– Det er veldig positivt at me har stabilisert oss på to faste mandat, og det er ei god utvikling for oss. Me ligg an til å gjera vårt beste val sidan 1993, og me opplever at alle ynskjer å vera i den posisjonen me er i no. Det har vore ei enorm utvikling for oss, meiner Myrvold, som er på spranget til valkamp i Bergen når Grenda ringer han.
Annonse
Om målinga til NRK skulle halda stikk, vil det bety følgjande fordeling på Hordalandsbenken i Stortinget:
Høgre: 5 (0)
Arbeidarpartiet: 4 (0)
SP: 2 (+1)
Annonse
Frp: 2 (0)
SV: 1 (0)
MDG: 1 (+1)
KrF: 0 (-1)
Venstre: 0 (-1)
Raudt: 0
Annonse
– Det er utjamningsmandata som er thrilleren som er i spel her. Me står fast på at no må me mobilisera, og ta heile landet i bruk. Dei som vil ta distrikta i bruk, må stemma Sp. Me er det tydelege alternativet på distriktspolitikk, når andre regjeringsalternativ er urealistiske, meiner Myrvold.
Raudgrønt fleirtal
– Ein ting er det kjekleriet som føregår i media, det andre er det som føregår i den faktiske politikken. Me går til val på ei Sp/Ap-regjering. Ein skal ha ei utjamning for å skapa ny næring over heile landet, og me må også ha ei endring i skatte- og avgiftspolitikken.
Meiningsmålinga NRK har fått gjort, viser at Arbeidarpartiet og Senterpartiet har 79 mandat til saman. Då manglar dei seks mandat for å sikra seg fleirtal i Stortinget. Det kan dei gjera på mange ulike vis, som tabellen viser.
– Kommunane er landets viktigaste artilleri når ein skal bekjempa ein pandemi, og kommuneøkonomien er under press for å yta tenester, og det presset må me letta på og utvikla. Eit regjeringsskifte skal gje ei forventning til betre kommuneøkonomi i heile landet. Eg har jo merka det som ordførar at me får handlingsrommet innskrenka, og me må halda oss på eit minimumsnivå på mange felt, sluttar Myrvold.
