Hanna og Fyllingsdalen på opprykksplass: - Me skal spela den fotballen me er best på!

Laurdag reiste Hanna Mehammer og Fyllingsdalen fulle av sjølvtillit til Stavanger og SR-Bank Arena. Det var nemleg duka for seriefinale mot opprykkskonkurrenten Viking, noko som enda i 1-0 siger til Fyllingsdalen - eit lag som har spelt feilfri gjennom hausten og som no ligg på toppen av tabellen.

– Jentene stod i mot køyret frå Viking og leverte nok ein imponerande bortekamp. Julies glimrande chip avgjorde kampen etter 77 minuttar. Det er ein enorm kraft i denne garderoben! Dei jobbar skjorta av seg for laget og for kvarandre. Takk til støtta frå tribunen i dag som stod godt mot 600 Vikingsupportarar, skriv trenar Lars Ove Moen på FK Fyllingsdalen si Facebook-side.

Trua på opprykk

For Hanna Mehammer er dette hennar første sesong med FK Fyllingsdalen. Signeringa vart gjort i januar i år, og det angrar ho ikkje på.

– Eg er veldig glad for at eg signerte for Fyllingsdalen. Det er eit lag med høge ambisjonar og ei bra og treningsvillig gruppe. Laget tok meg godt i mot og inkluderte meg frå starten av. Det er eit svært godt miljø på Fyllingsdalen, samt at det er konkurranse om plassane og eit stort ynskje om å gjera det best mogleg, fortel Mehammer til Grenda.

Hanna Mehammer har skrive under for 2. divisjonslag

Fyllingsdalen har 55 poeng etter 20 spelte kampar. Hanna og resten av laget ligg dermed godt an til sluttspel om opprykk til 1. divisjon nivå 2, noko Halsnøy-jenta har stor tru på.

– For å spela kvalifiseringskamp om opprykk må me vinna ein av to kampar som er igjen i sesongen. Planen vår for neste kamp vil vera å ha ei god treningsveke og ha fokus på neste kamp. Me skal spela den fotballen me er best på, og eg har verkeleg trua på opprykk med dette laget. Det hadde vore veldig kjekt, sluttar fotballtalentet.