Hangaren nede

Det nærmar seg byggjestart på Klette Brygge. Førre veke vart grunnen rydda for dei fem husværa i sjøkanten.

– Me har fått gjort litt undersøkingar av betongplata som ligg igjen, og fått gjort berekningar på kva ho toler. Slik det ser ut no, bygger me fire av husværa oppå den, medan den femte kjem på nordsida av plata, fortel utbyggjar Geir Rusten til Grenda.

Rusten har hatt ute skisser av husværa, som kjem midt mellom småbåthamna og Skålakaien. Responsen har ikkje lete venta på seg.

– Eg har ei lang liste med folk som vil kjøpa, men me har bestemt oss for å byggja dei heilt ferdige før me sel. Me ser på det som den smartaste måten for oss å gjera det på, då det gir oss høve til å byggja slik me ynskjer. Så får me sjå korleis me skal gjera det med sal når me er ferdige, seier Rusten.

Dei fem leilegheitene blir på 120 kvadratmeter og over to etasjar. Utbyggjaren legg opp til å skunda seg langsamt.

– No er me halvvegs gjennom vinteren, men ein veit aldri om det kjem stormar eller snø som hindrar framdrifta. Me får sjå når me blir ferdige, uttalar Rusten nøkternt.

Det er ikkje sikkert at det er rett å kalla hangaren som no er riven for eit landemerke i Rosendal, men det er ikkje tvil om at han har romma mykje historie.

– Eg trur hangaren vart bygd i 1972-73. Det var garantert mykje flyhistorie i dei veggane, sluttar Rusten.